കോഴിക്കോട്: ഓണാഘോഷത്തിനിടെ അപകടകരമായ രീതിയിൽ വാഹനങ്ങൾ ഓടിച്ച് വിദ്യാർത്ഥികൾ. സെപ്തംബർ 11-ന് കോഴിക്കോട് ഫാറൂഖ് കോളേജിലാണ് സംഭവം. മറ്റ് വാഹന യാത്രികരെയും അപകടപ്പെടുത്തുന്ന വിധത്തിലായിരുന്നു വിദ്യാർത്ഥികൾ വാഹനങ്ങളിൽ യാത്ര ചെയ്തത്.
നിരവധി ആഡംബര കാറുകളിലും എസ്.യു.വികളിലുമായാണ് വിദ്യാർത്ഥികളെത്തിയത്. കാറുകളുടെ മുകളിലും ഡോറിലും ഇരുന്നാണ് ഇവർ യാത്ര നടത്തിയത്. ഇതിന്റെ ദൃശ്യങ്ങൾ സമൂഹമാദ്ധ്യമങ്ങളിൽ പ്രചരിച്ചതോടെ സംഭവം മോട്ടോർ വാഹന വകുപ്പിന്റെ ശ്രദ്ധയിൽപ്പെട്ടു. അപകടകമായ രീതിയിൽ വാഹനമോടിച്ചതിന് വിദ്യാർത്ഥികൾക്കെതിരെ കേസെടുത്തതായി മോട്ടോർ വാഹന വകുപ്പ് അറിയിച്ചു.
വാഹനങ്ങൾ കണ്ടെത്താനുള്ള ശ്രമങ്ങൾ ആരംഭിച്ചതായും അധികൃതർ വ്യക്തമാക്കി. ഫോക്സ്വാഗൺ പോളോ, ഔഡി, മഹീന്ദ്ര ഥാർ, ടൊയോട്ട ഫോർച്യൂണർ തുടങ്ങി രൂപമാറ്റം വരുത്തിയതും അല്ലാത്തതുമായ നിരവധി വാഹനങ്ങളുമായാണ് വിദ്യാർത്ഥികൾ നിരത്തിലിറക്കിയത്.
