ആലപ്പുഴ: ആലപ്പുഴ മെഡിക്കല്‍ കോളജില്‍ ഡോക്ടറെ കയ്യേറ്റം ചെയ്തയാള്‍ അറസ്റ്റില്‍. ആശുപത്രിയില്‍ ചികിത്സയ്‌ക്കെത്തിയ തകഴി സ്വദേശി ഷൈജുമോന്‍ ആണ് അറസ്റ്റിലായത്. നെറ്റിയില്‍ തുന്നല്‍ ഇടാന്‍ ശ്രമിക്കുന്നതിനിടെ ഇയാള്‍ ഡോക്ടറുടെ കൈപിടിച്ച് തിരിക്കുകയായിരുന്നു. ശസ്ത്രക്രിയാ അത്യാഹിത വിഭാഗം ഹൗസ് സര്‍ജന്‍ ഡോ.അഞ്ജലിയ്‌ക്കാണ് പരിക്കേറ്റത്.
ഷൈജു മദ്യലഹരിയിലായിരുന്നുവെന്ന് ഡോക്ടര്‍ പറയുന്നു. നെറ്റിയില്‍ മുറിവുമായാണ് ഷൈജു ആശുപത്രിയില്‍ എത്തിയത്. സംഭവത്തെ തുടര്‍ന്ന് ആശുപത്രിയില്‍ പരിഭ്രാന്തി സൃഷ്ടിച്ച ഷൈജുവിനെ ആശുപത്രി ജീവനക്കാര്‍ ചേര്‍ന്നാണ് പിടിച്ചു മാറ്റിയത്. പിന്നാലെ ആശുപത്രിയില്‍ നിന്ന് കടന്നുകളഞ്ഞ ഇയാളെ വീട്ടില്‍ നിന്നാണ് അമ്പലപ്പുഴ പൊലീസ് പിടികൂടിയത്.
