ലോകത്തെ ഏറ്റവും ധനികരായ ആളുകൾ ആരെന്ന് ചോദിച്ചാൽ ഇലോൺ മസ്ക്, മാർക്ക് സക്കർബർഗ്, സെർജി ബ്രിൻ, മുകേഷ് അംബാനി എന്നിങ്ങനെ കുറെ പേരുകൾ നമുക്ക് പറയാൻ അറിയാം. എന്നാൽ ലോകത്തെ ഏറ്റവും സമ്പന്നനായ നായയെപ്പറ്റി അറിയുമോ! 400 മില്യൺ ഡോളർ, അതായത് ഏകദേശം 3356 കോടി രൂപ ആസ്തിയുള്ള ഒരു നായ.
ഗുന്തർ ആറാമൻ എന്ന ജർമ്മൻ ഷെപ്പേർഡാണ് ലോകത്തിലെ ഏറ്റവും സമ്പന്നനായ നായ. 1992-ൽ, മകന്റെ അകാല മരണത്തെത്തുടർന്ന് അനന്തരാവകാശിയില്ലാതെ ധനികയായിരുന്ന കൗണ്ടസ് കോർലോട്ട ലീബെൻസ്റ്റൈൻ 80 മില്യൺ ഡോളർ വിലമതിക്കുന്ന തന്റെ സമ്പത്ത് അന്നത്തെ പ്രിയപ്പെട്ട വളർത്തുനായ ഗുന്തർ മൂന്നാമന്റെ പേരിൽ എഴുതി വയ്ക്കുകയായിരുന്നു.
ആരും കൊതിച്ചുപോകുന്ന ആഡംബര ജീവിതമാണ് ഗുന്തർ ആറാമൻ എന്ന നായയുടേത്. 27 ജീവനക്കാരുടെ ടീം തന്നെയുണ്ട് ഗുന്തറിനൊപ്പം. ഇതിൽ ഒരു സ്വകാര്യ പാചകക്കാരൻ വരെ ഉണ്ട്. സ്വന്തമായി ഡ്രൈവർ. സഞ്ചരിക്കുന്നത് ബിഎംഡബ്ല്യുൽ. അന്താരാഷ്ട്ര യാത്രകൾക്കായി ഒരു സ്വകാര്യ ജെറ്റ്.
ഇത്രയും വലിയൊരു സമ്പത്തിന്റെ ചുമതല ഒരു നായ അങ്ങനെ നിർവഹിക്കുന്നുവെന്ന് ചിന്തിച്ചേക്കാം! ഉത്തരം ലളിതമാണ്. ഗുന്തറിന്റെ സമ്പത്ത് നിയന്ത്രിക്കുന്നത് കുറേയധികം മനുഷ്യർ ഉൾപ്പെടുന്ന ട്രസ്റ്റികളുടെ ഒരു ബോർഡാണ്. പണം വിവേകത്തോടെ നിക്ഷേപിക്കുന്നതിനും സമ്പത്ത് വളരുന്നുണ്ടെന്ന് ഉറപ്പാക്കുന്നതിനും ഈ ട്രസ്റ്റികൾ ഉത്തരവാദികളാണ്. പ്രാരംഭ അനന്തരാവകാശം ഏകദേശം 400 മില്യൺ ഡോളറാക്കി മാറ്റിക്കൊണ്ട് അവർ ശ്രദ്ധേയമായ ഒരു ജോലി ചെയ്തു. ലോകമെമ്പാടുമുള്ള മാൻഷനുകളും വില്ലകളും ഉൾപ്പെടെ വിവിധ സ്വത്തുക്കളിൽ ട്രസ്റ്റികൾ തന്ത്രപരമായ നിക്ഷേപം നടത്തിയിട്ടുണ്ട്. മുമ്പ് മഡോണയുടെ ഉടമസ്ഥതയിലുള്ള ഒരു മാളികയായിരുന്നു ശ്രദ്ധേയമായ ഒരു വാങ്ങൽ. അത് 29 മില്യൺ ഡോളറിന് ഗുന്തർ എന്ന നായ വാങ്ങിയത്.
