ന്യൂഡൽഹി: രാജ്യത്ത് വർദ്ധിച്ച് വരുന്ന തീവ്രവാദ പ്രവർത്തനങ്ങൾ തടയുന്നതിൽ ട്രൂഡോ സർക്കാർ വൻ പരാജയമാണെന്നും, തീവ്രവാദത്തിനും തീവ്രവാദികൾക്കും സർക്കാർ നൽകുന്ന നിശബ്ദ പിന്തുണയുടെ അനന്തരഫലങ്ങൾ രാജ്യത്തെ ജനങ്ങൾ അനുഭവിച്ച് തുടങ്ങാൻ പോവുകയാണെന്നുമുള്ള വിമർശനവുമായി കനേഡിയൻ ജേർണലിസ്റ്റ് ഡാനിയൽ ബോർഡ്മാൻ. ഇന്ത്യ ഉയർത്തിയ നിലപാട് പലപ്പോഴും കാനഡയിലെ ജനങ്ങൾക്കും അനുഭവപ്പെട്ടിട്ടുള്ളതാണെന്നും, രാജ്യത്തെ ന്യൂനപക്ഷ സമുദായങ്ങൾ വലിയ വെല്ലുവിളി നേരിടുന്നുണ്ടെന്നും ബോർഡ് മാൻ പറയുന്നു.
ഖാലിസ്ഥാനി മുദ്രാവാക്യങ്ങൾ ഉപയോഗിച്ച് ക്ഷേത്രങ്ങൾ വികൃതമാക്കുന്ന സംഭവങ്ങൾ ഉൾപ്പെടെ ബോർഡ്മാൻ ചൂണ്ടിക്കാട്ടി. ” ഇന്ത്യയിലെ നയതന്ത്രജ്ഞർക്ക് മാത്രമല്ല, കാനഡയിലെ ജനങ്ങൾക്കും പലപ്പോഴും സുരക്ഷിതത്വമില്ലായ്മ അനുഭവപ്പെടുന്നുണ്ട്. നമ്മുടെ ഇടയിലുള്ള ഏറ്റവും അക്രമാസക്തരായ, കനേഡിയൻ വിരുദ്ധരായ ആളുകളെയാണ് ഈ സർക്കാർ ഏറ്റവും നല്ല രീതിയിൽ പരിഗണിക്കുന്നത്.
ജിഹാദികൾ തെരുവുകളിലൂടെ മാർച്ച് ചെയ്യുകയാണ്. ജൂതന്മാരെ ഇല്ലാതാക്കുമെന്ന് അവർ പരസ്യമായി ഭീഷണി മുഴക്കുന്നു. ജൂത വിദ്യാലയങ്ങൾക്ക് നേരെ അവർ വെടിവയ്പ്പ് നടത്തുന്നു. സർക്കാർ ഇത്തരം തീവ്രവാദ പ്രവർത്തനങ്ങൾക്ക് കൊടുക്കുന്ന നിശബ്ദ പിന്തുണയ്‌ക്ക് അനന്തരഫലങ്ങൾ ഉണ്ടാകാൻ തുടങ്ങിയിരിക്കുകയാണ്. അതുകൊണ്ട് രാജ്യത്തെ നല്ലൊരു ശതമാനം കനേഡിയൻ പൗരന്മാർ ഇന്ത്യയിലെ സർക്കാർ പറയുന്നതിനെ അംഗീകരിക്കുന്നത്. ജൂത, ഹിന്ദു, ക്രിസ്ത്യൻ കനേഡിയന്മാർക്ക് ഈ രാജ്യത്ത് സുരക്ഷിതത്വം ലഭിക്കുന്നില്ല.
കഴിഞ്ഞ കുറച്ച് വർഷത്തിനിടെ 100ലധികം പള്ളികളാണ് ആക്രമിക്കപ്പെട്ടത്. നിയമത്തെ അനുസരിക്കുന്ന, ദേശസ്‌നേഹികളായ കനേഡിയന്മാരെ ജസ്റ്റിൻ ട്രൂഡോ കുറ്റവാളികളെ പോലെയാണ് കാണുന്നത്. പരസ്യമായ ഭീഷണി മുഴക്കിക്കൊണ്ടാണ് തീവ്രവാദികൾ പ്രത്യക്ഷപ്പെടുന്നത്. എന്നാൽ അവർ എല്ലായ്‌പ്പോഴും സുരക്ഷിതരായി തുടരുന്നു. ഖാലിസ്ഥാനികൾക്ക് ഇന്ദിരാഗാന്ധിയുടെ കൊലപാതകത്തെ കുറിച്ച് ഫ്‌ളോട്ട് ചെയ്യാനും, ഇന്ത്യയിലെ മന്ത്രിമാരെ കൊലപ്പെടുത്തുമെന്ന് പറയാനും ഒരു രാജ്യത്തെ നശിപ്പിച്ചു കളയാനുമെല്ലാം ധൈര്യം നൽകുന്ന സാഹചര്യമാണ് ഇവിടെയുള്ളത്. ട്രൂഡോയുടെ പാർട്ടി വരുന്ന തെരഞ്ഞെടുപ്പോട് കൂടി ഇല്ലാതാകുമെന്നും” ബോർഡ്മാൻ പറയുന്നു.
