1200 തുലാം തുടങ്ങുമ്പോൾ കലാകാരന്മാർക്ക് വീണ്ടും പ്രശസ്തിയും കുപ്രസിദ്ധിയും ലഭിക്കുന്ന സംഭവ വികാസങ്ങൾ ഉണ്ടാവും. ശക്തമായ കാറ്റും മഴയും വീണ്ടും ദുരന്തങ്ങൾ ഉണ്ടാവുകയും കൃഷി വിഭവങ്ങൾക്ക് നാശം ഉണ്ടാകുകയും ചെയ്യും. പ്രധാനപ്പെട്ട ക്ഷേത്രത്തിന്റെ പേരിൽ വീണ്ടും വിവാദങ്ങൾ ഉണ്ടാവും. വൻ രീതിയിലുള്ള വാഹനാപകടം മൂലം കുറെ മനുഷ്യ ജീവിതം ദുരിതത്തിലാകുകയോ മരണമോ സംഭവിക്കും. രാഷ്‌ട്രീയത്തിൽ വീണ്ടും പോരുകൾ ശക്തമാകുകയും സാമ്പത്തിക അട്ടിമറി ഉണ്ടാവുകയും ചെയ്യും. രാഷ്‌ട്രീയത്തിൽ ശക്തമായ അഴിച്ചുപണി നടക്കുവാൻ ഇടയുണ്ട്. ജനങ്ങൾക്ക് വരവിനേക്കാൾ ചെലവ് കൂടും. നിയമങ്ങൾ വീണ്ടും ശക്തമാകും.
പൊതുഫലങ്ങൾ ഒരു നിശ്ചിത കാലയളവിലെ ഗ്രഹനിലയെ അടിസ്ഥാനമാക്കിയുള്ള പ്രവചനങ്ങളാണ്. എന്നാൽ, ഓരോ വ്യക്തിയും അനുഭവിക്കുന്ന യഥാർത്ഥ ഫലങ്ങൾ ജനന സമയത്തെ ഗ്രഹനില, അതിൽ നിന്നുണ്ടാകുന്ന യോഗങ്ങൾ, നിലവിലെ ദശ, അപഹാരങ്ങൾ എന്നിവയെ ആശ്രയിച്ചിരിക്കും. എന്നിരുന്നാലും, ഈ പൊതുഫലങ്ങളെ ഒരു സൂചനയായി ഉപയോഗിച്ച്, വിശദമായ ജാതക വിശകലനം നടത്തി ദശാനാഥനെ പ്രീതിപ്പെടുത്താനുള്ള വഴികൾ തേടുകയും ദോഷപരിഹാരങ്ങൾ ചെയ്യുകയും ചെയ്താൽ, നല്ല സമയങ്ങളുടെ ഗുണഫലങ്ങൾ പരമാവധി അനുഭവിക്കാനും പ്രതികൂല സമയങ്ങളെ കൂടുതൽ എളുപ്പത്തിൽ തരണം ചെയ്യാനും സാധിക്കും.
മേടം രാശി (അശ്വതി, ഭരണി, കാർത്തിക ആദ്യ കാൽഭാഗം)
ദമ്പതികൾ തമ്മിൽ ഐക്യക്കുറവ് അനുഭവപ്പെടുമെങ്കിലും ജീവിത പങ്കാളിയോടുള്ള തുറന്ന സമീപനത്തിൽകൂടി തെറ്റിദ്ധാരണകൾ ഏറെക്കുറെ മാറുവാൻ സഹായിക്കും. ജീവിതപങ്കാളിക്കും സന്താനങ്ങൾക്കും രോഗദുരിതം വന്നു ചേരുവാൻ സാധ്യതയുണ്ട്. സുഹൃത്തുക്കളുമായി പിണങ്ങേണ്ട സാഹചര്യമുണ്ടാകുമെങ്കിലും പിണക്കം മാറി അവരോടൊപ്പം സമയം ചെലവഴിക്കുവാൻ അവസരം വന്നുചേരും. തൊഴിൽക്ലേശം, ധനക്ലേശം അനുഭവപ്പെടും. അന്യജനങ്ങളിൽ നിന്നും ദോഷാനുഭവങ്ങൾ, സ്ത്രീകളോട് വിരോധം എന്നിവ ഉടലെടുക്കും. ഉദരരോഗം, അർശ്ശസ് അലട്ടും. വാഹനം ഓടിക്കുന്നവർ ജാഗ്രത പാലിക്കുക.
ഇടവം രാശി (കാർത്തിക അവസാന മുക്കാൽ ഭാഗം, രോഹിണി, മകയിര്യം ആദ്യ പകുതിഭാഗം)
വിദ്യാപുരോഗതി, വിദ്യാഭ്യാസ കാര്യങ്ങൾക്ക് വേണ്ടി വിദേശ യാത്ര-വാസം എന്നിവ അനിവാര്യമായി തീരും. മാനസികമായി വളരെ അധികം വെല്ലുവിളികൾ നേരിടേണ്ട സന്ദർഭങ്ങൾ ഉണ്ടാവും. സ്ത്രീമൂലം സാമ്പത്തികലാഭം, മനഃസന്തോഷം ലഭിക്കും. കുടുംബ ബന്ധുജന വിരഹം, അന്യസ്ത്രീ ബന്ധം, ഉണ്ടാകും. മേലധികാരിയുടെ പ്രശംസ ലഭിക്കുവാനോ ജോലിയിൽ സ്ഥാനക്കയറ്റമോ പ്രതീക്ഷിക്കാം. ജാതകത്തിൽ ബുധൻ ബലവാനായി നിൽക്കുന്നവർക്ക് എഴുത്തു വഴി ഗുണാനുഭവങ്ങൾ ഉണ്ടാവുക, ജീവിതത്തിൽ സൗഭാഗ്യങ്ങൾ തേടി വരിക എന്നിവ ഉണ്ടാവും. എന്നാൽ വ്യാഴ ദശ നടക്കുന്നവർക്കു വ്യാഴം അനുകൂല സ്ഥിതി അല്ലെങ്കിൽ വരവിൽ കവിഞ്ഞ ചെലവ്, അപമാനം, അന്യദേശവാസം എന്നിവ അനുഭവത്തിൽ വരും.
മിഥുനം രാശി (മകയിര്യം അവസാന പകുതിഭാഗം, തിരുവാതിര, പുണർതം ആദ്യ മുക്കാൽഭാഗം)
വ്യവഹാര പരാജയം, ചിലർക്ക് കേസ് വഴക്കുകളിൽ അകപ്പെടേണ്ടി വരിക, ബന്ധനസ്ഥനാകേണ്ടി വരിക അഥവാ കാരാഗ്രഹവാസം വരിക, അടുത്ത ബന്ധുക്കളിൽ നിന്നും സുഹൃത്തുക്കളിൽ നിന്നും ദോഷാനുഭവങ്ങൾ ഉണ്ടാകുവാനും കലഹത്തിനും സാധ്യത ഉണ്ട്. ശരീര സുഖക്കുറവ്, രോഗോപദ്രവം, ശത്രുഭയം, അന്യ ജനങ്ങളിൽ നിന്നും ദോഷാനുഭവങ്ങൾ, ബന്ധു ജനങ്ങളോട് ശത്രുത, തൊഴിൽ രംഗത്ത് ക്ലേശങ്ങൾ, ധനഹാനി, തീരുമാനങ്ങളിൽ ഉറച്ചു നിൽക്കാത്ത സ്വഭാവം, വാക്ക് മാറുന്ന സ്വഭാവം, എല്ലാ കാര്യങ്ങളിലും ഒരുതരം പേടി അല്ലെങ്കിൽ മനക്കട്ടി ഇല്ലാതെ വരിക, സ്ത്രീകൾ മൂലം അപവാദങ്ങൾ കേൾക്കേണ്ടി വരിക, സന്താനങ്ങളെ കൊണ്ട് ദോഷഫലങ്ങൾ, മരണ ഭയം, ലഹരിയിൽ അമിതമായ ആസക്തി, യാത്രാക്ലേശം, യാത്രയിൽ അപകടങ്ങൾ എന്നിവയ്‌ക്ക് സാധ്യത ഉണ്ട്.
കർക്കിടകം രാശി (പുണർതം അവസാന കാൽഭാഗം, പൂയം, ആയില്യം)
അനാവശ്യമായ കൂട്ടുകെട്ടുകൾ മൂലം ദുർപ്രവർത്തികൾ ചെയ്യുവാനുള്ള അവസരം അല്ലെങ്കിൽ സാഹചര്യം വന്നുചേരും. മദ്യത്തിലും മറ്റ് ലഹരി പദാർത്ഥങ്ങളിൽ താത്പര്യം വർദ്ധിക്കുകയും അതുവഴി പല തരത്തിലുള്ള നാശനഷ്ടങ്ങൾ സംഭവിക്കുകയും ചെയ്യും. സ്ത്രീകളിൽ താത്പര്യം കൂടി മാനഹാനി, ധനനഷ്ടം എന്നിവ ഉണ്ടാകും. ജീവിത പങ്കാളിക്കും സന്താനങ്ങൾക്കും അസുഖങ്ങൾ വരികയും അവരുമായി കലഹം ഉണ്ടാവുകയും വഴി മനശാന്തി കുറയും. ഭൂമി നഷ്ടം -കുടുംബ അഭിവൃദ്ധി കുറവ് അനുഭവപ്പെടും. ഭക്ഷ്യവിഷബാധ ഏൽക്കുവാൻ സാധ്യതയുണ്ട് . അനാവശ്യമായ കേസുകൾ വരുവാൻ സാധ്യതയുണ്ട്. പ്രവർത്തന മാന്ദ്യത, ശത്രു ഭയം, എന്നാൽ ചിലർക്ക് മാതാവിൽ നിന്നും ഗുണാനുഭവങ്ങൾ ഉണ്ടാകും. യാത്രാക്ലേശം , യാത്രയിൽ അപകടങ്ങൾ എന്നിവ ഉണ്ടാകും.
ജയറാണി ഈ വി .
WhatsApp No : 9746812212
(പാരമ്പര്യ ജ്യോതിഷ കുടുംബത്തിലെ അംഗം . ഇരുപതിലേറെ വർഷമായി ജ്യോതിഷം സംഖ്യാശാസ്ത്രം വാസ്തു ആചാര അനുഷ്ഠാന വിഷയങ്ങൾ കൈകാര്യം ചെയ്യുന്നു)
Monthly Prediction by Jayarani E.V
