കോഴിക്കോട്: നാളെ ഗോവിന്ദൻ മാഷ് വോട്ട് താരാമെന്ന് പറഞ്ഞാലും വാങ്ങുമെന്ന് കോൺഗ്രസ് നേതാവ് കെ മുരളീധരൻ. തലമുറ മാറുമ്പോൾ ചില അഡ്ജസ്റ്റ്‌മെന്റ് ചെയ്യേണ്ടി വരുമെന്ന് പറഞ്ഞുകൊണ്ടായിരുന്നു കെ മുരളീധരന്റെ വാക്കുകൾ. പാലക്കാട് ഉൾപ്പെടെ തെരഞ്ഞെടുപ്പുകളിലെ സിപിഎം- കോൺഗ്രസ് സഹകരണം രാഷ്‌ട്രീയ കേന്ദ്രങ്ങളിൽ ചർച്ചയാകുന്നതിനിടയ്‌ക്കാണ് കെ മുരളീധരന്റെ വാക്കുകൾ.
കെ മുരളീധരന്റെ അമ്മയെ അവഹേളിച്ച രാഹുൽ മാങ്കൂട്ടത്തിന് വേണ്ടി വോട്ട് തേടുന്ന മുരളീധരനോട് സഹതാപം മാത്രമാണുളളതെന്നും എന്തിനാണ് ഇങ്ങനെ ആട്ടും തുപ്പും സഹിച്ച് കോൺഗ്രസിൽ തുടരുന്നതെന്നും ബിജെപി സംസ്ഥാന അദ്ധ്യക്ഷൻ കെ സുരേന്ദ്രൻ ഇന്നലെ ചോദിച്ചിരുന്നു. എന്നാൽ കെ സുരേന്ദ്രന്റെ വാക്കുകൾ തമാശയാണെന്ന് ആയിരുന്നു കെ മുരളീധരന്റെ പ്രതികരണം. ബി.ജെ.പിയിലേക്ക് പോകില്ലെന്നും പാർട്ടിയിൽ അവഗണന ഉണ്ടായാൽ രാഷ്‌ട്രീയത്തിൽ നിന്ന് റിട്ടയർ ചെയ്യുമെന്നും മുരളീധരൻ പറഞ്ഞു.
രമ്യ ഹരിദാസിനെ പിൻവലിച്ച് ഒരു ഒത്തുതീർപ്പിനും ഇല്ല. അൻവറിന്റെ പിന്തുണയെ സംബന്ധിച്ച ചർച്ച ഈ ഘട്ടത്തിൽ അനാവശ്യമാണെന്നും കെ മുരളീധരൻ പറഞ്ഞു. പി.വി.അൻവറിന്റെ സ്വാധീന മേഖല വയനാട് മണ്ഡലത്തിലാണ്. അവിടെ നിരുപാധികം പ്രിയങ്ക ഗാന്ധിക്ക് അൻവർ പിന്തുണ പ്രഖ്യാപിച്ചിട്ടുണ്ട്. പാലക്കാടും ചേലക്കരയിലും അൻവറിന് സ്വാധീനമില്ല. സ്ഥാനാർത്ഥികളെ വെച്ച് വിലപേശൽ നല്ലതല്ല. രമ്യ ഹൈക്കമാൻഡ് പ്രഖ്യാപിച്ച സ്ഥാനാർത്ഥിയാണെന്നും കെ മുരളീധരൻ പറഞ്ഞു.
രാഷ്‌ട്രീയത്തിൽ ഒന്നും ഒന്നും രണ്ടല്ല, ഒന്നും ഒന്നും കൂടിയാൽ പൂജ്യത്തിലേക്ക് പോകാൻ സാധ്യതയുണ്ട്. അൻവറിന്റെ പിന്തുണ ചർച്ച ഈ ഘട്ടത്തിൽ അനാവശ്യം. സ്ഥാനാർത്ഥികളെ പിൻവലിക്കണമെന്ന് അൻവറിന് കത്ത് കൊടുത്തില്ലെന്നും അദ്ദേഹം പറഞ്ഞു. വയനാട് പ്രചാരണത്തിന് പോകും. പാലക്കാടും ചേലക്കരയും പോകുന്ന കാര്യം തീരുമാനിച്ചിട്ടില്ലെന്നും കെ മുരളീധരൻ പറഞ്ഞു.
