നീലേശ്വരം: കാസർകോട് നീലേശ്വരത്ത് കളിയാട്ട മഹോത്സവത്തിനിടെ വെടിക്കെട്ടുപുരയ്‌ക്ക് തീപിടിച്ച് അപകടം. അഞ്ഞൂറ്റമ്പലം വീരർകാവ് കളിയാട്ട മഹോത്സവത്തിനിടെ രാത്രി 12 മണിയോടെയാണ് അപകടമുണ്ടായത്. സ്ത്രീകളും കുട്ടികളും ഉൾപ്പെടെ 154ലധികം പേരാണ് ആശുപത്രികളിൽ ചികിത്സ തേടിയത്. 97 പേർ ഇപ്പോഴും വിവിധ ആശുപത്രികളിൽ ചികിത്സയിലാണ്. ഇതിൽ 8 പേരുടെ നില ഗുരുതരമാണെന്നാണ് വിവരം.
ഗുരുതരമായി പരിക്കേറ്റവരെ മംഗളൂരുവിലും പരിയാരം മെഡിക്കൽ കോളേജ് ആശുപത്രിയിലും പ്രവേശിപ്പിച്ചു. വെടിക്കെട്ട് നടക്കുന്നതിന് സമീപത്തായി പടക്കങ്ങൾ സൂക്ഷിച്ചതാണ് അപകടകാരണമെന്നാണ് വിവരം. പടക്കം പൊട്ടിച്ചതിന്റെ തീപ്പൊരി വീണ് വെടിക്കെട്ട് പുരയ്ക്ക് തീപിടിക്കുകയായിരുന്നു. തിക്കിലും തിരക്കിലും നിരവധി പേർക്ക് പരിക്കേറ്റതായി ദൃക്‌സാക്ഷികൾ പറയുന്നു.
കാഞ്ഞങ്ങാട് ജില്ലാ ആശുപത്രിയിൽ 16, മാവുങ്കൽ സഞ്ജീവനി ആശുപത്രിയിൽ 10, പരിയാരം മെഡിക്കൽ കോളേജിൽ 5, കാഞ്ഞങ്ങാട് ഐഷാൽ ആശുപത്രിയിൽ 17, കാഞ്ഞങ്ങാട് അരിമല ആശുപത്രിയിൽ 3, കാഞ്ഞങ്ങാട് മിംസ് ആശുപത്രിയിൽ 18, മിംസ് ആശുപത്രി കോഴിക്കോട് 2, കാഞ്ഞങ്ങാട് ദീപ ആശുപത്രി ഒരാൾ, ചെറുവത്തൂർ കെ എച്ച് ആശുപത്രിയിൽ 2, കാഞ്ഞങ്ങാട് മൻസൂർ ആശുപത്രി 5, മംഗലാപുരം എ ജെ മെഡിക്കൽ കോളേജ് 18 പേർ ഉൾപ്പെടെ ആകെ 97 പേരാണ് നിലവിൽ ആശുപത്രികളിൽ ചികിത്സയിൽ തുടരുന്നത്.
അതേസമയം പടക്കങ്ങൾ സൂക്ഷിച്ചത് അനുമതിയില്ലാതെയാണെന്ന് ജില്ലാ കളക്ടർ കെ ഇമ്പശേഖർ പറഞ്ഞു. പടക്കം പൊട്ടിച്ചതിന് അടുത്ത് തന്നെ കൂടുതൽ പടക്കങ്ങൾ സൂക്ഷിച്ചതാണ് അപകടത്തിന് കാരണമായത്. 100 മീറ്റർ അകലം വേണമെന്നിരിക്കെ പടക്കപ്പുരയുടെ രണ്ടോ മൂന്നോ അടി മാത്രം അകലെ വച്ചാണ് പടക്കം പൊട്ടിച്ചത്. സ്ഥലത്ത് നിന്ന് സാമ്പിളുകൾ ശേഖരിച്ചതായും കളക്ടർ വ്യക്തമാക്കി.
