പാലക്കാട്: ഐ ഫോൺ 13 പ്രോ തകരാറിലായതിന് പിന്നാലെ ഉപഭോക്താവിന്റെ പരാതിയിൽ നഷ്ടപരിഹാരം നൽകാൻ ഉപഭോക്തൃ തർക്ക പരിഹാര കോടതിയുടെ വിധി. പാലക്കാട് എടത്തനാട്ടുകര സ്വദേശി സഞ്ജയ് കൃഷ്ണനാണ് കോടതിയുടെ അനുകൂല വിധി ലഭിച്ചത്. 75,000 രൂപ നഷ്ടപരിഹാരം നൽകാനാണ് കോടതി വിധി.
ആപ്പിൾ ഐ ഫോൺ 13 പ്രോ വാങ്ങി ഏതാനും മാസത്തിനുള്ളിൽ തകരാറ് സംഭവിക്കുകയായിരുന്നു. ഫോൺ അപ്‌ഡേറ്റ് ചെയ്തതാണ് തകരാറിന് കാരണമെന്ന് സംസ്‌കൃതം അദ്ധ്യാപകൻ കൂടിയായ സഞ്ജയ് കൃഷ്ണൻ കോടതിയിൽ വാദിച്ചു.
സ്‌ക്രീൻ ഉപയോഗിക്കാൻ സാധിക്കാത്ത വിധം കേടുവന്നെന്നും ശരിയാക്കി നൽകണമെന്ന് ആവശ്യപ്പെട്ട് ആപ്പിളിന്റെ സർവീസ് സെന്ററിനെ സമീപിച്ചെങ്കിലും ജീവനക്കാരിൽ നിന്നും മോശം പെരുമാറ്റമാണുണ്ടായതെന്നും സ്‌ക്രീൻ ശരിയാക്കി നൽകിയില്ലെന്നും സഞ്ജയ് പറഞ്ഞു.
വാദം കേട്ട കോടതി, ഫോണിന്റെ വിലയോടൊപ്പം 10% പലിശയും കോടതി ചെലവുമടക്കം 75,000 രൂപ നഷ്ടപരിഹാരം നൽകാൻ ഉത്തരവിടുകയായിരുന്നു. ഒന്നര വർഷത്തെ നിയമ പോരാട്ടത്തിനൊടുവിലാണ് അനുകൂല വിധി ലഭിച്ചതെന്നും ഐ ഫോൺ ഉപയോഗിക്കുന്ന മറ്റ് പലർക്കും ഇത്തരത്തിൽ നിരവധി പ്രശ്‌നങ്ങളുണ്ടെന്നും സഞ്ജയ് പറഞ്ഞു.
