മോസ്‌കോ: രാജ്യത്തെ ജനനനിരക്കിലെ കുറവ് പരിഹരിക്കാൻ റഷ്യ ‘സെക്സ് മന്ത്രാലയം’ രൂപീകരിക്കാൻ ഒരുങ്ങുന്നതായി റിപ്പോർട്ടുകൾ. പ്രസിഡൻ്റ് വ്‌ളാഡിമിർ പുടിന്റെ വിശ്വസ്ത നീന ഒസ്‌റ്റാനീന അത്തരമൊരു മന്ത്രാലയത്തിനായി വാദിക്കുന്ന ഹർജി അവലോകനം ചെയ്യുകയാണെന്നാണ് സൂചന. റഷ്യൻ പാർലമെൻ്റിന്റെ കുടുംബ സംരക്ഷണം, പിതൃത്വം, പ്രസവം, ബാല്യം എന്നിവ സംബന്ധിച്ച കമ്മിറ്റിയുടെ അദ്ധ്യക്ഷയാണ് നീന.
റഷ്യ-യുക്രെയ്‌ൻ യുദ്ധത്തിൽ മരണങ്ങൾ വർധിച്ചതോടെ ജനസംഖ്യയിലെ കുറവ് പരിഹരിക്കാനുള്ള നടപടികൾ കൈക്കൊള്ളണമെന്ന് പുടിൻ ആഹ്വനം ചെയ്തിരുന്നു. ഇതിനായി റഷ്യൻ ഉദ്യോഗസ്ഥർ വിവിധ പദ്ധതികളും ആശയങ്ങളും അവതരിപ്പിക്കുന്നതിനിടെയാണ് പുതിയ നീക്കം. ഇത്തരത്തിൽ പല രസകരമായ നിർദ്ദേശങ്ങളും പ്രസിഡന്റിന് മുന്നിലെത്തിയിട്ടുണ്ട്.
കൂടുതൽ കുട്ടികളെ ജനിപ്പിക്കാൻ ദമ്പതികളെ പ്രോത്‌സാഹിപ്പിക്കുന്നതിന്റെ ഭാഗമായി രാത്രി 10 മണിക്കും പുലർച്ചെ 2 മണിക്കും ഇടയിൽ ഇൻ്റർനെറ്റ് സേവനവും ലൈറ്റുകളും ഓഫ് ചെയ്യണമെന്ന അസാധാരണമായ ഒരു നിർദ്ദേശവും അക്കൂട്ടത്തിലുണ്ടായിരുന്നു. വീട്ടിലിരിക്കുന്ന അമ്മമാർക്ക് വീട്ടുജോലികൾക്കായി സംസ്ഥാനം പണം നൽകണം എന്നതാണ് മറ്റൊരു ആശയം. കുട്ടികളുണ്ടാകാൻ ദമ്പതികളെ പ്രേരിപ്പിക്കുന്നതിന് വിവിധ പ്രദേശങ്ങളിലെ അധികാരികൾ സ്വന്തം നിലയിൽ സംരംഭങ്ങൾ നടപ്പിലാക്കുന്നുമുണ്ട്. ഖബറോവ്സ്കിൽ, 18-നും 23-നും ഇടയിൽ പ്രായമുള്ള വിദ്യാർത്ഥിനികൾക്ക് ഒരു കുട്ടിക്ക് 900 പൗണ്ട് ലഭിക്കും. ചെല്യാബിൻസ്കിൽ ആദ്യം ജനിക്കുന്ന കുട്ടിക്ക് 8,500 പൗണ്ട് ആണ് തുക.
