മേജർ മുകുന്ദ് വരദരാജന്റെ ജീവിതകഥ പറയുന്ന ചിത്രം അമരൻ തിയേറ്ററിൽ കുതിക്കുന്നതിനിടെ ഭാര്യയുടെ പിറന്നാൾ ദിനത്തിൽ സർപ്രൈസുമായി ശിവകാർത്തികേയൻ. ചിത്രത്തിൽ ശിവകാർത്തികേയൻ അവതരിപ്പിച്ച മുകുന്ദ് വരദരാജന്റെ വേഷത്തിലെത്തിയാണ് ഭാര്യ ആർതിയ്ക്ക് താരം പിറന്നാൾ ആശംസകൾ നേർന്നത്. സർപ്രൈസായി പിറന്നാളാശംസകൾ നൽകുന്ന വീഡിയോ സമൂഹമാദ്ധ്യമങ്ങളിൽ വൈറലാവുകയാണ്.
അടുക്കളയിൽ ജോലി ചെയ്ത് നിൽക്കുന്ന ആർതിയെ പുറകിലൂടെ പോയി പേടിപ്പിക്കാൻ നോക്കുന്നതാണ് വീഡിയോ. കഥാപാത്രത്തിന്റെ വേഷത്തിൽ പ്രത്യക്ഷപ്പെട്ട ശിവകാർത്തികയേനെ കണ്ടതോടെ ഞെട്ടിനിൽക്കുന്ന ആരതിയെയും വീഡിയോയിൽ കാണാം. ഹാപ്പി ഹാപ്പി ബർത്ഡേ ആരതി എന്ന് കുറിച്ചുകൊണ്ട്, അമരനിലെ ഹിറ്റ് ഗാനത്തോടെയാണ് ശിവകാർത്തികേയൻ വീഡിയോ പങ്കുവച്ചിരിക്കുന്നത്.
View this post on Instagram
മുറപ്പെണ്ണായ ആർതിയെയാണ് ശിവകാർത്തികേയൻ വിവാഹം കഴിച്ചത്. ഇരുവരുടെയും പ്രണയവും വിവാഹവും തുറന്നുപറയുന്ന അഭിമുഖം സമൂഹമാദ്ധ്യമങ്ങളിൽ ഏറെ വൈറലായിരുന്നു. നടന്റെ ഭാര്യ എന്നതിലുപരി സാധാരണക്കാരിയായി വേദികളിലും പൊതുപരിപാടികളിലും എത്തുന്ന ആർതിയുടെ ചിത്രങ്ങളും വീഡിയോകളും സമൂഹമാദ്ധ്യമങ്ങളിൽ എപ്പോഴും ശ്രദ്ധനേടാറുണ്ട്.
ഒക്ടോബർ 31-ന് റിലീസ് ചെയ്ത ചിത്രം മികച്ച പ്രതികരണം നേടി ബോക്സോഫീസിൽ കുതിക്കുകയാണ്. 168 കോടിയാണ് ചിത്രം ഇതുവരെ നേടിയത്. സായ് പല്ലവിയുടെയും ശിവകാർത്തികേയന്റെയും പ്രകടനത്തെ വാനോളം പുകഴ്‌ത്തുകയാണ് ആരാധകർ.
