ന്യൂഡൽഹി: അടുത്ത മാസം ഓസ്‌ട്രേലിയയ്‌ക്കെതിരായി നടക്കുന്ന ഏകദിന പരമ്പരയ്‌ക്കുള്ള ഇന്ത്യൻ വനിത ടീമിനെ പ്രഖ്യാപിച്ച് ബിസിസിഐ. 16 അംഗ ടീമിനെയാണ് പ്രഖ്യാപിച്ചത്. ടീമിൽ നിന്ന് ബാറ്റർ ഷഫാലി വർമയെ ഒഴിവാക്കി. ഇതിനുപകരമായി മലയാളി താരം മിന്നുമണി ടീമിൽ ഇടംനേടി.
ന്യൂസിലാൻഡിനെതിരെയുള്ള മത്സരത്തിൽ മികച്ച പ്രകടനം കാഴ്ചവച്ച തേജൽ ഹസബ്‌നിസും സൈമ ഠാക്കൂറുമാണ് ടീമിൽ ഇടംപിടിച്ച മറ്റ് താരങ്ങൾ. പരിക്ക് മൂലം കളികളിൽ നിന്ന് വിട്ടുനിന്നിരുന്ന പേസർ ഹർലീൻ ഡിയോളും ടീമിൽ തിരിച്ചെത്തിയിട്ടുണ്ട്.
ഈ വർഷം ആറ് മത്സരങ്ങളിൽ നിന്നായി 108 റൺസ് മാത്രമാണ് ഷഫാലിക്ക് നേടാൻ സാധിച്ചത്. മുൻ മത്സരങ്ങളിലെ മോശം പ്രകടനം വിലയിരുത്തിയ ശേഷമാണ് ഷഫാലിയെ ഒഴിവാക്കാൻ ബിസിസിഐ തീരുമാനിച്ചത്. 33 റൺസായിരുന്നു ഷഫാലിയുടെ ഉയർന്ന സ്‌കോർ. ദയാലൻ ഹേമലത, ഉമാ ചേത്രി, സയാലി സത്ഗരെ എന്നിവരും ന്യൂസിലൻഡിനെതിരായ ഏകദിന പരമ്പരയിൽ ഇടംപിടിച്ചില്ല.
ഹർമൻപ്രീത് കൗർ ആണ് പെൺപ്പടയെ നയിക്കുന്നത്. സ്മൃതി മന്ദാന വൈസ് ക്യാപ്റ്റനാകും. യാസ്തിക ഭാട്ടിയും റിച്ച ഘോഷുമാണ് വിക്കറ്റ് കീപ്പർമാർ. ആദ്യ ഏകദിനം ബ്രിസ്‌ബെയ്‌നിൽ നടക്കും. ഡിസംബർ 5 നാണ് മത്സരം. രണ്ടാം ഏകദിനം മത്സരം ഇതേ വേദിയിൽ ഡിസംബർ 8ന് നടക്കും. അവസാന മത്സരം 11 ന് പെർത്തിൽ നടക്കും.
ഇന്ത്യൻ ടീം: ഹർമൻപ്രീത് കൗർ (ക്യാപ്റ്റൻ), സ്മൃതി മന്ദാന (വൈസ് ക്യാപ്റ്റൻ), യാസ്തിക ഭാട്ടിയ (വിക്കറ്റ് കീപ്പർ), റിച്ച ഘോഷ് (വിക്കറ്റ് കീപ്പർ) പ്രിയ പുനിയ, ജെമീമ റോഡ്രിഗസ്, ഹർലീൻ ഡിയോൾ, തേജൽ ഹസബ്‌നിസ്, ദീപ്തി ശർമ, മിന്നുമണി, പ്രിയ മിശ്ര, രാധ യാദവ്, ടിറ്റാസ് സാധു, അരുന്ധതി റെഡ്ഡി, രേണുക സിംഗ് ഠാക്കൂർ, സൈമ ഠാക്കൂർ.
