ന്യൂഡൽഹി: യുഎസ് പ്രതിരോധ സെക്രട്ടറി ലോയ്ഡ് ഓസ്റ്റിനുമായി കൂടിക്കാഴ്ച നടത്തി പ്രതിരോധ മന്ത്രി രാജ്നാഥ് സിംഗ്. ലാവോസിൽ നടക്കുന്ന 11-ാമത് ആസിയാൻ പ്രതിരോധ മന്ത്രിമാരുടെ യോഗത്തോടനുബന്ധിച്ചാണ് ഇരുവരും കൂടിക്കാഴ്ച നടത്തിയത്. ലാവോസ് പ്രതിരോധ മന്ത്രി ജനറൽ ചാൻസമോൺ ചാന്യാലത്തിന്റെ നേതൃത്വത്തിലാണ് യോഗം നടക്കുന്നത്.
ലോകരാജ്യങ്ങൾ നേരിടുന്ന പ്രശ്നങ്ങളെ കുറിച്ച് ഇരുനേതാക്കളും ചർച്ച ചെയ്തു. ഇന്ത്യ- യുഎസ് പ്രതിരോധ മേഖലകൾ തമ്മിലുള്ള പരസ്പര സഹകരണം കൂടുതൽ ദൃഢമാക്കുന്നത് കേന്ദ്രീകരിച്ചായിരുന്നു ഇരുവരുടെയും ചർച്ച.
ഇന്തോ-പസഫിക് മേഖല നേരിടുന്ന പ്രകൃതി ദുരന്തങ്ങളെ അതിവേഗം ചെറുക്കുന്നതിനായുള്ള ക്വാഡ് ഇൻഡോ-പസഫിക് ലോജിസ്റ്റിക് നെറ്റ്‌വർക്ക് പൈലറ്റ് പദ്ധതി ആരംഭിക്കുന്നതിനെ കുറിച്ചും ഇരു നേതാക്കളും ചർച്ച ചെയ്തു.
ഇന്ത്യ-യുഎസ് ബന്ധം ശക്തിപ്പെടുത്തുന്നതിൽ യുഎസ് പ്രതിരോധ സെക്രട്ടറി ലോയ്ഡ് ഓസ്റ്റിൻ നിർണായക പങ്കുവഹിക്കുന്നുണ്ടെന്നും അദ്ദേഹത്തിന്റെ പ്രവർത്തനങ്ങൾ മാതൃകാപരമാണെന്നും രാജ്നാഥ് സിംഗ് എക്സിൽ കുറിച്ചു.
ത്രിദിന സന്ദർശനത്തിനായി കഴിഞ്ഞ ദിവസമാണ് രാജ്നാഥ് സിംഗ് ലാവോസിലെത്തിയത്. ചൈന, യുഎസ്, ഓസ്‌ട്രേലിയ രാജ്യങ്ങളിലെ പ്രതിനിധികളുമായും അദ്ദേഹം കൂടിക്കാഴ്ച നടത്തും.
