തിരുവനന്തപുരം: സംസ്ഥാനത്ത് ഞായറാഴ്ച മുതൽ മഴ കനക്കുമെന്ന് മുന്നറിയിപ്പ്. 7 ജില്ലകൾക്ക് ഞായറാഴ്ച യെല്ലോ അലർട്ട് നൽകിയിട്ടുണ്ട്. ആലപ്പുഴ മുതൽ മലപ്പുറം വരെയാണ് മുന്നറിയിപ്പുള്ളത്. തിങ്കളാഴ്ച സംസ്ഥാനത്തെ എല്ലാ ജില്ലകളിലും മഴ മുന്നറിയിപ്പുണ്ട്.
എറണാകുളം മുതൽ വയനാട് വരെയുള്ള 7 ജില്ലകൾക്ക് തിങ്കളാഴ്ച ഓറഞ്ച് അലർട്ടാണ്. മറ്റ് ജില്ലകളിൽ യെല്ലോ അലർട്ടും പ്രഖ്യാപിച്ചു. ചൊവ്വാഴ്ച മലപ്പുറം മുതൽ കാസർകോട് വരെയുള്ള 5 ജില്ലകളിൽ ഓറഞ്ച് അലർട്ടും 7 ജില്ലകളിൽ യെല്ലോ അലർട്ടുമാണ്.
ഫെംഗൽ ചുഴലിക്കാറ്റ് ബംഗാൾ ഉൾക്കടലിൽ നിന്ന് തീരംതൊടുന്ന സാഹചര്യത്തിൽ തമിഴ്നാട്ടിൽ കനത്ത മഴ തുടരുകയാണ്. ഇതിന്റെ സ്വാധീനഫലമായി കേരളത്തിലെ പല ജില്ലകളിലും നേരിയ തോതിൽ മഴയും മൂടിക്കെട്ടിയ കാലാവസ്ഥയുമാണ് നിലവിലുള്ളത്.
ചുഴലിക്കാറ്റിനെ തുടർന്ന് തമിഴ്നാട്ടിലെ എട്ട് ജില്ലകളിലെ സ്കൂളുകൾക്ക് അവധിയാണ്. ചെന്നൈ വിമാനത്താവളം അടയ്ക്കുകയും ചെയ്തു. ശക്തമായ കാറ്റും മഴയുമാണ് തീരദേശ ജില്ലകളിൽ റിപ്പോർട്ട് ചെയ്യുന്നത്. മുൻകരുതലിന്റെ ഭാഗമായി തമിഴ്നാട്ടിൽ രണ്ടായിരത്തോളം ദുരിതാശ്വാസ ക്യാമ്പുകൾ സജ്ജമാണ്. ആന്ധ്രാപ്രദേശ് തീരപ്രദേശവും അതീവ ജാഗ്രതയിലാണ് തുടരുന്നത്.
