തിരുവണ്ണാമലൈ: കാർത്തിക ദീപ മഹോത്സവത്തോടനുബന്ധിച്ച് സ്‌കൂളുകൾക്ക് ഒമ്പത് ദിവസത്തെ അവധി പ്രഖ്യാപിച്ചു. തിരുവണ്ണാമലൈ ജില്ലയിലെ 156 സ്‌കൂളുകൾക്കാണ് നാളെ (ഡിസംബർ 8) മുതൽ 16 വരെ അവധി പ്രഖ്യാപിച്ചത്
തിരുവണ്ണാമലൈ ജില്ലയിലെ അണ്ണാമലയാർ ക്ഷേത്രത്തിൽ കാർത്തികമാസം 13-നാണ് തൃക്കാർത്തിക ദീപോത്സവം. എല്ലാ വർഷവും ക്ഷേത്രത്തിൽ പുലർച്ചെ നാലിന് ഭരണി ദീപവും വൈകീട്ട് ആറിന് 2668 അടി ഉയരത്തിൽ കാർത്തിക മഹാദീപവും തെളിക്കും.
മഹാദീപം ദർശിക്കാൻ ഈ വർഷം 40 ലക്ഷം ഭക്തർ തിരുവണ്ണാമലയിലെത്തുമെന്നാണ് പ്രതീക്ഷിക്കുന്നത്. കാർത്തിക ദീപ മഹോത്സവത്തോടനുബന്ധിച്ച് തിരുവണ്ണാമലയിൽ പ്രത്യേക ക്രമീകരണങ്ങൾ ഒരുക്കുന്നത് പുരോഗമിക്കുന്നു. തമിഴ്‌നാട്ടിലെ വിവിധ ജില്ലകളിൽ നിന്നായി 16,000 പോലീസുകാരാണ് തിരുവണ്ണാമലൈ ദീപാരാധനയ്‌ക്ക് സുരക്ഷയൊരുക്കുന്നത്. തിരുവണ്ണാമലൈ കോർപ്പറേഷനിലെയും പരിസര പ്രദേശങ്ങളിലെയും 156 സ്‌കൂളുകളിൽ അവർക്ക് താമസ സൗകര്യം ഒരുക്കും.
പോലീസ് ക്യാമ്പുകൾ സ്ഥിതി ചെയ്യുന്നതിനാൽ ആ സ്‌കൂളുകൾക്ക് നാളെ മുതൽ ഡിസംബർ 16 വരെ 9 ദിവസത്തേക്ക് തിരുവണ്ണാമലൈ ജില്ലാ പ്രാഥമിക വിദ്യാഭ്യാസ ഓഫീസർ അവധി പ്രഖ്യാപിച്ചു. ജില്ലാ കളക്ടറുടെ നിർദ്ദേശ പ്രകാരമാണ് അവധി പ്രഖ്യാപിച്ചിരിക്കുന്നത്.
