ആലപ്പുഴ: സഹോദരങ്ങളെ കാണാൻ സ്വന്തം വീട്ടിൽ പോയതിന് ഭാര്യയുടെ കഴുത്തിൽ വെട്ടുകത്തി വച്ച് വധഭീഷണി. ആലപ്പുഴ ആലിശ്ശേരി സ്വദേശി നസീറിനെ പൊലീസ് അറസ്റ്റ് ചെയ്തു.
കൂലിപ്പണിക്കാരിയാണ് നസീറിന്റെ ഭാര്യ ഷക്കീല. രാവിലെ ജോലിക്കായി ഇറങ്ങിയപ്പോൾ മകനോട് ചേർത്തലയിലുള്ള വീട്ടിൽ പോയി സഹോദരങ്ങളെ കണ്ടതിനുശേഷമേ തിരിച്ചെത്തുകയുള്ളൂവെന്നു പറഞ്ഞിരുന്നു. ഭാര്യ മകനോട് പറയുന്നത് നസീറും കണ്ടിരുന്നു.
വൈകുന്നേരം മദ്യപിച്ചെത്തിയ നസീർ വെട്ടുകത്തിയെടുത്ത് ഭാര്യയുടെ കഴുത്തിൽവെച്ച് അമർത്തുകയും അസഭ്യം പറഞ്ഞ് കൊണ്ട് വെട്ടുകത്തിയുടെ പിൻഭാഗംകൊണ്ട് മുഖത്തും മുതുകിലും മർദ്ദിക്കുകയും ചെയ്തു. പിന്നാലെ ഇവർ ചികിത്സ തേടി. സംഭവത്തിന് പിന്നാലെ നഗരത്തിന്റെ വിവിധയിടങ്ങളിലായി ഒളിച്ചുനടക്കുകയായിരുന്നു നസീർ. ഇതിനിടയിലാണ് സൗത്ത് പൊലീസ് അറസ്റ്റ് ചെയ്തത്.
