തിരുവനന്തപുരം: കുട്ടികൾ നോക്കി ചിരിച്ചെന്ന് ആരോപിച്ച് വീട്ടിൽ അതിക്രമിച്ച് കയറി നായയെ കൊണ്ട് കടിപ്പിച്ച് ഗുണ്ടാ ആക്രമണം. തിരുവനന്തപുരം കഴക്കൂട്ടത്താണ് മനസാക്ഷി മരവിപ്പിക്കുന്ന ക്രൂരത. ചിറക്കൽ സ്വദേശി സക്കീറിന് നായയുടെ ആക്രമണത്തിൽ പരിക്കേറ്റു. കഠിനകുളം പൊലീസ് സ്റ്റേഷനിൽ ഗുണ്ടാ ലിസ്റ്റിൽ ഉൾപ്പെട്ട കമ്രാൻ എന്ന സമീറാണ് അക്രമം നടത്തിയത്.
കമ്രാൻ നായയുമായി പൊതുനിരത്തിലെത്തി ഭീകാരന്തരീഭക്ഷം സൃഷ്ടിച്ചിരുന്നു. വഴിയിലൂടെ നടന്നുപോയ കമ്രാനെ നോക്കി സക്കീറിന്റെ വീട്ടിലെ കുട്ടികൾ ചിരിച്ചു. ഇതാണ് ഇയാളെ പ്രകോപിതനാക്കിയതെന്നാണ് വിവരം. പിന്നാലെ വീട്ടിൽ അതിക്രമിച്ച് കയറി വീട്ടിലുണ്ടായിരുന്ന സക്കീറിനെ നായയെ കൊണ്ട് കടുപ്പിച്ചു. തടയാൻ ശ്രമിച്ചപ്പോൾ മർദ്ദിച്ചതായും വിവരമുണ്ട്.
സക്കീർ ഇറങ്ങിയോടിയതോടെ കമ്രാൻ വീടിന് മുന്നിൽ പെട്രോൾ ഒഴിച്ച് തീക്കൊളുത്തി. പിന്നാലെ വഴിയിലൂടെ വന്ന ഇതരസംസ്ഥാന തൊഴിലാളിയെയും കമ്രാൻ നായയെക്കൊണ്ട് കടിപ്പിച്ചു. പ്രതിക്കായി പൊലീസ് അന്വേഷണം ആരംഭിച്ചു.
