പതുങ്ങിയിരിക്കുന്ന നിശബ്ദ കൊലയാളിയെന്നാണ് കൊളസ്‌ട്രോളിനെ ഡോക്ടർമാർ വിശേഷിപ്പിക്കുന്നത്. കാരണം കൊളസ്‌ട്രോൾ ഉണ്ടെന്ന് കണ്ടെത്തിക്കഴിഞ്ഞാലും പലരും അതിന് വലിയ പ്രാധാന്യം കൊടുക്കാറില്ല എന്നത് തന്നെ പ്രധാന കാരണം. എന്നാൽ ശ്രദ്ധിച്ചില്ലെങ്കിൽ കൊളസ്‌ട്രോൾ ജീവന് തന്നെ ഭീഷണിയായി മാറിയേക്കാമെന്നാണ് പഠനങ്ങൾ പറയുന്നത്. രക്തത്തിലെ കൊളസ്‌ട്രോളിന്റെ അളവ് തുടർച്ചയായി ഉയർന്ന നിലയിലായാൽ അതിറോസ്‌ക്ലിറോസിസ് എന്ന അവസ്ഥയിലേക്ക് പോകാം. അതായത് രക്തക്കുഴലുകളിൽ കൊഴുപ്പിന്റെ ഘടകങ്ങൾ അടിഞ്ഞുകൂടുന്ന അവസ്ഥയാണിത്. പുകവലി, മദ്യപാനം, വ്യായാമമില്ലായ്മ എന്നിവയെല്ലാം കൊളസ്‌ട്രോൾ കൂടുന്നതിന് കാരണമാണ്.
ചീത്ത കൊളസ്‌ട്രോൾ അധികമായാൽ രക്തധമനികളിൽ ബ്ലോക്ക് വരികയും, ഹൃദയത്തിലേക്കുള്ള രക്തപ്രവാഹം തടസപ്പെടുകയും ചെയ്യും. ഹാർട്ട് അറ്റാക്കിനും, പക്ഷാഘാതത്തിനും ഇത് വഴി വച്ചേക്കാം. കൈകാലുകളിലെ രക്തധമനികളിലെ തടസം പെരിഫെറൽ വാസ്‌കുലാർ രോഗങ്ങൾക്ക് കാരണമാകുന്നു. രക്തധമനികളിലെ ഇത്തരം തടസങ്ങൾ ശരീരത്തിന്റെ ഏത് ഭാഗത്തുള്ള അവയവങ്ങളിലും പ്രശ്‌നങ്ങളുണ്ടാക്കാൻ കാരണമാണ്.
കാലുകളിലെ വേദന, മരവിപ്പ്, മുട്ടുവേദന ഇതെല്ലാം കൊളസ്‌ട്രോളിന്റെ ചില ലക്ഷണങ്ങളാണ്. ചർമ്മത്തിൽ മഞ്ഞനിറം കാണപ്പെടുന്നതും കൊളസ്‌ട്രോളിന്റെ സൂചനയാകാം. കണ്ണിന്റെ മൂലകളിൽ, കൈരേഖകളിൽ, കാലിന്റെ പുറകിൽ ഒക്കെ കൊളസ്‌ട്രോൾ അടിയാം. ഇവിടങ്ങളിൽ കാണുന്ന തിടപ്പും കൊളസ്‌ട്രോളിന്റെ ലക്ഷണമാണ്. കണ്ണിന്റെ കോർണിയയ്‌ക്ക് ചുറ്റും നേരിയ വെളുത്ത നിറത്തിലെ ആവരണം കാണപ്പെടുന്നതും കൊളസ്‌ട്രോൾ കൂടുന്നതിന്റെ സൂചനയാണ്.
കാലുകൾ തണുത്ത് ഇരിക്കുന്നത്. കഴുത്തിന് പുറകിൽ ഉളുക്ക് വന്ന പോലത്തെ അവസ്ഥ, ശരീരത്തിൽ പലയിടങ്ങളിലും കാണപ്പെടുന്ന അസാധാരണമായ മുഴ, ചർമ്മത്തിലെ നിറവ്യത്യാസം ഇതെല്ലാം കൊളസ്‌ട്രോൾ കൂടിയെന്നതിന്റെ ലക്ഷണങ്ങളായി പലരിലും കാണാറുണ്ട്. ഹൃദയ രക്തക്കുഴലുകളിലാണ് തടസം വരുന്നതെങ്കിൽ നെഞ്ചുവേദനയും പടി കയറുമ്പോൾ കിതപ്പും ഉണ്ടാകുന്നു. ചീത്ത കൊളസ്‌ട്രോൾ അധികമായാൽ ദഹനക്കേടും വയറിളക്കവും ഉണ്ടാകാം. അതുകൊണ്ട് തന്നെ ഇത്തരം ലക്ഷണങ്ങൾ ശരീരം പ്രകടിപ്പിക്കുമ്പോൾ തന്നെ കൃത്യമായ ചികിത്സ തേടുന്നതാണ് നല്ലത്.
