ഇന്ന് ഒട്ടുമിക്കവരിലും ആസ്മയും തലവേദനയും സാധാരണമായി കണ്ടുവരുന്ന രോഗങ്ങളാണ്. പുരുഷന്മാരേക്കാൾ കൂടുതൽ സ്ത്രീകളെയാണ് ഇവ കൂടുതലും ബാധിക്കുന്നത്. ഇതിനുകാരണം അന്വേഷിച്ചുപോയാൽ പകുതിപ്പേരും അടുക്കളയിലെത്തും. കാരണം വീട്ടമ്മമാരിൽ കണ്ടുവരുന്ന പല ആരോഗ്യ പ്രശ്നങ്ങളുടെയും ഉറവിടം അടുക്കളയാണ്. പലരും ഗ്യാസ് സ്റ്റൗവിൽ ദീർഘനേരം പാചകം ചെയ്യുന്നവരാണ്.
ഗ്യാസ് സ്റ്റൗവുമായുള്ള സമ്പർക്കം വീട്ടമ്മാരിൽ ശ്വാസകോശ സംബന്ധമായ അസുഖങ്ങൾക്കും തലവേദനയ്‌ക്കും കാരണമാകുമെന്നാണ് വിദഗ്‌ദ്ധർ പറയുന്നത്. ഗ്യാസ് സ്റ്റൗ കത്തിക്കുമ്പോഴുണ്ടാകുന്ന ജ്വാലകളുടെ നിറവ്യത്യാസം ആരോഗ്യ പ്രശ്‍നങ്ങളുണ്ടാകാനുള്ള സാധ്യത വർധിപ്പിക്കും. സാധാരണയായി സ്റ്റൗ കത്തിക്കുമ്പോൾ നീല നിറത്തിലുള്ള ജ്വാലകളാണ് ഉണ്ടാകുന്നത്. ഇതിൽ ഭയപ്പെടാനൊന്നുമില്ല.
എന്നാൽ തീജ്വാലകൾക്ക് ചുവപ്പോ മഞ്ഞയോ നിറമാണെങ്കിൽ അത് ശ്രദ്ധിക്കണം. സ്റ്റൗവിൽ നിന്ന് പുറന്തള്ളുന്ന കാർബൺ മോണോക്സൈഡ് വാതകം മൂലമാണ് ഈ നിറം മാറ്റം സംഭവിക്കുന്നത്. ഇത് ആരോഗ്യത്തിന് വളരെയേറെ ഹാനികരമാണ്. ചുവപ്പോ മഞ്ഞയോ നിറത്തിൽ തീ കത്തുകയാണെങ്കിൽ അത് കാർബൺ മോണോക്സൈഡ് വാതകത്തിന്റെ സാന്നിധ്യമാണ് സൂചിപ്പിക്കുന്നതെന്നർത്ഥം. ഇത് ശ്വാസകോശം ഉൾപ്പെടെയുള്ള അവയവങ്ങളെ നേരിട്ട് ബാധിക്കും. ഭാവിയിൽ ആസ്മ തലവേദന എന്നിവയ്‌ക്ക് കാരണമാകുകയും ചെയ്യും.
അഴുക്കുകൊണ്ട് അടഞ്ഞ ബർണർ സുഷിരങ്ങൾ തീജ്വാലയുടെ നിറം മാറ്റത്തിന് പിന്നിലെ ഒരു പൊതുവായ കാരണമാണ്. ബേക്കിംഗ് സോഡയും ബ്രഷും ഉപയോഗിച്ച് ബർണർ എളുപ്പത്തിൽ വൃത്തിയാക്കി ഈ പ്രശ്‌നം പരിഹരിക്കാം. അല്ലാത്തപക്ഷം ഒരു പ്രൊഫഷണൽ ഗ്യാസ് സ്റ്റൗ റിപ്പയർ ടെക്നീഷ്യനിൽ നിന്ന് സഹായം തേടണം.
