എന്റെ ​ഗുരുനാഥൻ, ശക്തിയും പ്രചോദനവുമാണ് അദ്ദേഹം; മലയാള ഭാഷയ്‌ക്ക് തീരാദുഃഖം: എംടിയുടെ വിയോ​ഗത്തിൽ വിനീത്

കലാകാരന്മാർക്ക് മാത്രമല്ല, മലയാള ഭാഷയ്‌ക്ക് തന്നെ തീരാദുഃഖമാണ് എംടി വാസുദേവൻ നായരുടെ വിയോ​ഗമെന്ന് നടൻ വിനീത്. ആചാര്യനായ, എന്റെ ​​ഗുരുസ്ഥാനത്തുള്ള വ്യക്തിയാണ് അദ്ദേഹമെന്നും പൂർണ ആശിർവാദത്തോടെ എന്നെ സിനിമയിൽ പരിചയപ്പെടുത്തിയ ​ഗുരുനാഥനാണെന്നും വിനീത് പറഞ്ഞു. സിതാരയിലെത്തി, എംടിക്ക് അന്ത്യാഞ്ജലി അർപ്പിച്ച ശേഷം മാദ്ധ്യമങ്ങളോട് പ്രതികരിക്കുകയായിരുന്നു വിനീത്.

“എംടി സാറിന്റെ ആശിർവാദവും അനു​ഗ്രഹവും കൊണ്ടാണ് ഒരുപാട് കാര്യങ്ങൾ പഠിക്കാൻ സാധിച്ചത്. അദ്ദേഹത്തിന്റെ കഥാപാത്രങ്ങൾ അവതരിപ്പിച്ചാണ് ഞാൻ വളർന്നത്. എംടി സാറിന്റെ എട്ട് സിനിമകളിൽ അഭിനയിക്കാനുള്ള ഭാ​ഗ്യം എനിക്കുണ്ടായി”.

“ഓരോ സിനിമകളും എനിക്ക് ഓരോ അനുഭവങ്ങളാണ് തന്നത്. ഇന്ന് ആ ചിത്രങ്ങൾ കാണുമ്പോൾ ഞങ്ങളൊക്കെ എത്രത്തോളം ഭാ​ഗ്യം ചെയ്തവരാണെന്ന് തോന്നിപോകും. എവിടെ വച്ച് കണ്ടാലും മക്കളെ പോലെ വാത്സല്യത്തോടെയാണ് അദ്ദേഹം സംസാരിക്കുന്നത്. അത് തന്നെയാണ് എന്നെ പോലെയുള്ള കലാകാരന്മാരുടെ ശക്തിയും പ്രചോദനവും. അദ്ദേഹം എന്നും ഞങ്ങളുടെ മനസുകളിൽ ഉണ്ടായിരിക്കും”.

അദ്ദേ​ഹത്തിന്റെ കൃ‍തികളിലൂടെയും സൃഷ്ടികളിലൂടെയും ലോകമെമ്പാടുമുള്ള മലയാളികളുടെ മനസിൽ അദ്ദേഹമുണ്ടായിരിക്കും. തീരാനഷ്ടവും ദുഃഖവുമാണ് തങ്ങൾക്കെന്നും വിനീത് പറഞ്ഞു.

എംടി തിരക്കഥ എഴുതിയ ‘നഖക്ഷതങ്ങൾ’ എന്ന ചിത്രത്തിൽ ശ്രദ്ധേയ കഥാപാത്രത്തെ അവതരിപ്പിച്ചാണ് വിനീത് മലയാളികൾക്ക് സുപരിചിതനായത്. ഹരിഹരൻ സംവിധാനം ചെയ്ത ചിത്രത്തിൽ മോനിഷയായിരുന്നു നായിക.