കൊച്ചി: വയനാട് ദുരിതബാധിതരുടെ പുനരധിവാസത്തിന്റെ ഭാഗമായി എസ്റ്റേറ്റ് ഭൂമികൾ ഏറ്റെടുക്കുന്നതിനെതിരെ ഉടമകൾ നൽകിയ ഹർജികൾ ഹൈക്കോടതി തള്ളി. ഹാരിസൺ മലയാളം ലിമിറ്റഡ്, എൽസ്റ്റോൺ ടീ എസ്റ്റേറ്റ് എന്നിവരുടെ ഹർജികളാണ് തള്ളിയത്. നാളെ മുതൽ ഭൂമി അളന്ന് തിട്ടപ്പെടുത്തുന്ന നടപടികളിലേക്ക് കടക്കാമെന്ന് ഹൈക്കോടതി ഉത്തരവിട്ടു.
എസ്റ്റേറ്റ് ഉടമകളുടെ കയ്യിലുള്ള ഭൂമി ലാൻഡ് അക്വിസിഷൻ നിയമപ്രകാരം സർക്കാരിന് ഏറ്റെടുക്കാമെന്ന് കോടതി പറഞ്ഞു. എന്നാൽ 2013 ലെ വ്യവസ്ഥകൾ പ്രകാരം സർക്കാർ കമ്പനി ഉടമകൾക്ക് ആവശ്യമായ നഷ്ടപരിഹാരം നൽകണമെന്ന വ്യവസ്ഥയും കോടതി മുന്നോട്ടുവച്ചു. ഭൂമി ഏറ്റെടുക്കുന്നതിന് മുൻപ് ഇത് നൽകിയിരിക്കണം. നഷ്ടപരിഹാര തുകയിൽ കമ്പനികൾക്ക് ഏതെങ്കിലും തരത്തിലുള്ള അതൃപ്തിയുണ്ടെങ്കിൽ നിയമ നടപടികളുമായി മുന്നോട്ട് പോകാമെന്നും കോടതി വ്യക്തമാക്കി.
വയനാട് ദുരിതബാധിതർക്കായി ടൗൺഷിപ്പ് എന്ന ആശയം നടപ്പിലാക്കാനാണ് സർക്കാർ ഭൂമി ഏറ്റെടുക്കൽ നടപടികൾ ആരംഭിച്ചത്. എന്നാൽ ഇതിനെതിരെ എസ്റ്റേറ്റ് ഉടമകൾ കോടതിയെ സമീപിക്കുകയായിരുന്നു. ഹർജികളിൽ വിശദമായ വാദം കഴിഞ്ഞ നവംബർ 26 ന് പൂർത്തിയായിരുന്നു. ഇതിലാണ് ഹൈക്കോടതിയുടെ സിംഗിൾ ബെഞ്ച് ഉത്തരവ് പുറപ്പെടുവിച്ചത്.
