തിരുവനന്തപുരം: എബിവിപി 2025-2026 വർഷത്തെ കേരള സംസ്ഥാന അദ്ധ്യക്ഷനായി ഡോ. വൈശാഖ് സദാശിവനെയും സംസ്ഥാന സെക്രട്ടറിയായി ഇ.യു. ഈശ്വരപ്രസാദിനെയും വീണ്ടും തെരഞ്ഞെടുത്തു. എബിവിപി 2025-2026 വർഷത്തെ സംഘടനാ തെരഞ്ഞെടുപ്പ് വരണാധികാരി ഡോ. ബി.ആർ. അരുൺ തെരഞ്ഞെടുപ്പ് പ്രക്രിയക്ക് നേതൃത്വം നൽകി. പുതിയ ഭാരവാഹികൾ 2025 ജനുവരി 3,4,5 തിയ്യതികളിൽ എറണാകുളത്ത് നടക്കുന്ന 40-ാമത് സംസ്ഥാന സമ്മേളനത്തിൽ വച്ച് ഔദ്യോഗികമായി ചുമതല ഏറ്റെടുക്കും.
തിരുവനന്തപുരം നെയ്യാറ്റിൻകര സ്വദേശിയായ ഡോ. വൈശാഖ് സദാശിവൻ കെമിസ്ട്രിയിൽ ഡോക്‌ടറേറ്റ് നേടിയിട്ടുണ്ട്. നിലവിൽ ആലപ്പുഴ സനാതന ധർമ കോളേജിൽ രസതന്ത്ര വിഭാഗം അസിസ്റ്റൻ്റ് പ്രൊഫസറായി അദ്ധ്യാപനം നടത്തുന്നു. 2005 മുതൽ എബിവിപിയിൽ പ്രവർത്തിക്കുന്നയാളാണ്. ഇ.യു ഈശ്വരപ്രസാദ് എറണാകുളം കാലടി സ്വദേശിയാണ്. കാലടി ശ്രീ ശങ്കരാചാര്യ സംസ്‌കൃത യൂണിവേഴ്‌സിറ്റി യിൽ നിന്നും എം.എസ്.ഡബ്ല്യൂ പഠനം പൂർത്തിയാക്കി.
