പത്തനംതിട്ട :വടക്കേ ഇന്ത്യയിൽ നിന്ന് എണ്ണായിരത്തോളം കിലോമീറ്റർ കാൽനടയാത്രചെയ്ത് ശബരിമല സന്നിധാനത്ത് എത്തി രണ്ട് ഭക്തർ. വിശ്വശാന്തിക്കായുള്ള പ്രാർഥനയുമായി കാസർകോട് കുഡ്‌ലു രാംദാസ് നഗർ സ്വദേശികളായ സനത്കുമാർ നായക്, സമ്പത്ത്കുമാർ ഷെട്ടി എന്നിവരാണ് 223 ദിവസം കാൽനടയായി യാത്രചെയ്ത് അയ്യപ്പ സന്നിധിയിലെത്തിയത്.
ഇരുമുടിക്കെട്ടുമേന്തി ബദരീനാഥിൽനിന്ന് തുടങ്ങി വിവിധ തീർഥാടനകേന്ദ്രങ്ങളിലും ക്ഷേത്രങ്ങളിലും സന്ദർശിച്ചാണ് ഇവർ സന്നിധാനത്ത് എത്തിയത്. ശങ്കരാചാര്യർ സ്ഥാപിച്ച നാലു മഠങ്ങളും മറ്റ് തീർഥാടനകേന്ദ്രങ്ങളും ഈ യാത്രയിൽ ഇവർ സന്ദർശിച്ചു.
കാസർകോട് നിന്ന് മേയ് 26ന് ട്രെയിൻ മാർഗം യാത്ര തിരിച്ച ഇവർ ബദരിനാഥിൽ എത്തി, ജൂൺ 2 ന് അവിടെ വെച്ച് കെട്ട്‌നിറച്ച് ജൂൺ മൂന്നിന് അവിടെനിന്ന് കാൽനടയായി ശബരിമലയാത്ര തുടങ്ങി. അയോധ്യ, ഉജ്ജയിനി, ദ്വാരക, പുരി ജഗന്നാഥ്, രാമേശ്വരം, അച്ചൻകോവിൽ, എരുമേലി എന്നീ വഴിയാണ് സന്നിധാനത്ത് എത്തിച്ചേർന്നത്. യാത്രാ മദ്ധ്യേ വിവിധ ക്ഷേത്രങ്ങളിൽ തങ്ങുകയും, അവിടുത്തെ ഭക്ഷണം കഴിക്കുകയും ചെയ്തു. ചില സ്ഥലങ്ങളിൽ പാചകം ചെയ്തു കഴിച്ചാണ് യാത്ര തുടർന്നത്.
