ദുബായിൽ നടന്ന 24H എൻ‍ഡ്യൂറൻസ് റേസിംഗിൽ ഉജ്ജ്വല നേട്ടം സ്വന്തമാക്കിയ തമിഴ് സൂപ്പർ സ്റ്റാർ അജിതിനെ പ്രശംസിച്ച് സഹതാരങ്ങൾ. ട്രാക്കിൽ തീ പാറുന്ന പ്രകടനം കാഴ്ചവച്ച അജിതിന്റെ റേസിംഗ് ടീം മൂന്നാം സ്ഥാനമാണ് സ്വന്തമാക്കിയത്. അഭിനേതാവ് എന്നതിലുപരി റേസിംഗിൽ ഏറെ താത്പര്യമുള്ള അജിതിന്റെ ഈ നേട്ടത്തെ പ്രശംസിക്കുകയാണ് തെന്നിന്ത്യൻ സിനിമാ ലോകം.
911 കാറ്റഗറിയിലാണ് അജിത്തും സംഘവും മൂന്നാം സ്ഥാനം നേടിയത്. ജിടി-4 വിഭാഗത്തിൽ സ്പിരിറ്റ് ഓഫ് റേസ് ട്രോഫിയും താരം സ്വന്തമാക്കിയിട്ടുണ്ട്. ഭാര്യ ശാലിനി, മക്കളായ അനൗഷ്ക, ആദ്‌വിക്‌, നടൻ മാധവൻ എന്നിവർ മത്സരം കാണാൻ എത്തിയിരുന്നു. സ്വപ്നങ്ങൾ സാക്ഷാത്കരിക്കപ്പെടുന്നു, റിയൽ ഹീറോ എന്നാണ് അജിതിനെ പ്രശംസിച്ചുകൊണ്ട് മാധവൻ കുറിച്ചത്.
രാജ്യത്തിന് അഭിമാനമാണ് അജിതെന്ന് നടൻ നാഗചൈതന്യ ഇൻസ്റ്റഗ്രാമിൽ കുറിച്ചു. എന്തൊരു യാത്ര, എന്തൊരു വിജയം. നിങ്ങളെ ഓർത്ത് അഭിമാനിക്കുന്നവെന്ന് നാഗചൈതന്യ കുറിച്ചു.
അജിതിനെ ഓർക്കുമ്പോൾ ആവേശം തോന്നുന്നുവെന്നാണ് കമൽഹാസൻ കുറിച്ചത്. കന്നി മത്സരത്തിൽ തന്നെ അജിത് കുമാർ അസാധാരണ നേട്ടം കരസ്ഥമാക്കിയിരിക്കുന്നു. ഇന്ത്യൻ മോട്ടോർ സ്പോർട്സിലെ അഭിമാനകരമായ നിമിഷമാണിതെന്നും കമൽഹാസൻ എക്സിൽ പറഞ്ഞു.
നടി സാമന്തയും അജിതിനെ പ്രശംസിച്ചുകൊണ്ട് ആശംസകൾ അറിയിച്ചു. കഠിനാധ്വാനത്തിന്റെ ഉത്തമ ഉദാഹരണമാണ് താങ്കളെന്ന് സാമന്ത കുറിച്ചു.
