തിരുവനന്തപുരം : ഏറെ പ്രതീക്ഷയോടെ പ്രേക്ഷകർ കാത്തിരിക്കുന്ന മോഹൻലാൽ ചിത്രം എമ്പുരാന്റെ റിലീസിന് മുൻപായി ലൂസിഫർ വീണ്ടും തിയേറ്ററിലെത്തിക്കാൻ ആഗ്രഹിക്കുന്നുവെന്ന് നിർമാതാവ് ആന്റണി പെരുമ്പാവൂർ. എമ്പുരാൻ റിലീസിന് മുൻപ് ലൂസിഫർ റീ റിലീസ് ചെയ്യാൻ ആഗ്രഹമുണ്ടെന്നും എന്നാൽ അതിൽ തീരുമാനമൊന്നുമായിട്ടില്ലെന്നും ആന്റണി പെരുമ്പാവൂർ പറഞ്ഞു.
ടൊവിനോ തോമസ് നായകനായ അജയന്റെ രണ്ടാം മോഷണം എന്ന സിനിമയുടെ സക്സസ് മീറ്റിലാണ് ആന്റണി പെരുമ്പാവൂർ ഇക്കാര്യം പറഞ്ഞത്. ‘ലൂസിഫർ വീണ്ടും റിലീസ് ചെയ്യണമെന്ന് ആഗ്രഹിക്കുന്നുണ്ട്. തിയേറ്ററിൽ രണ്ടാഴ്ച പ്രദർശിപ്പിക്കണം. അതിനുശേഷം എമ്പുരാൻ റിലീസ് ചെയ്യണമെന്ന ആഗ്രഹം മനസിലുണ്ട്. കൂടുതൽ ഒന്നും തീരുമാനിച്ചിട്ടില്ല” എന്നാണ് ആ വേദിയിൽ ആന്റണി പെരുമ്പാവൂർ പറഞ്ഞത്.
ലൂസിഫർ റിലീസ് ചെയ്തത് 2019 ലായിരുന്നു. സ്റ്റീഫൻ നെടുമ്പള്ളി എന്ന കഥാപാത്രമായി മോഹൻലാൽ നിറഞ്ഞു നിന്ന സിനിമയിൽ മഞ്ജു വാര്യർ, പൃഥ്വിരാജ് സുകുമാരൻ, വിവേക് ഒബ്റോയ്, ടൊവിനോ തോമസ്, ഇന്ദ്രജിത്ത് സുകുമാരൻ തുടങ്ങി ഒട്ടനവധി താരങ്ങൾ ഉണ്ടായിരുന്നു.
ആ സിനിമയുടെ തുടർച്ചയാണ് എമ്പുരാന്‍. പാന്‍ ഇന്ത്യന്‍ റിലീസായാണ് ഈ സിനിമ തിയേറ്ററുകളില്‍ എത്തുന്നത്.
വൻ ബജറ്റിലാണ് എമ്പുരാൻ ഒരുങ്ങുന്നത് .കഴിഞ്ഞ ദിവസം പുറത്തുവിട്ട സിനിമയുടെ ടീസർ മികച്ച പ്രതികരണമാണ് നേടിയത്.
