ന്യുമോണിയ ബാധിച്ച് ചികിത്സയിലായിരുന്ന തായ്വാൻ നടി ബാർബി ഹ്സു അന്തരിച്ചു. 48-ാം വയസിലായിരുന്നു അന്ത്യം. നടിയുടെ സഹോദരിയും ഭർത്താവും വിയോഗ വാർത്ത സ്ഥിരീകരിച്ചിട്ടുണ്ട്. ദക്ഷിണ കൊറിയൻ ഗായകനും ഡിജെയുമായ കൂ ജങ് യുപ് ആണ് ഭർത്താവ്. ജപ്പാനിൽ അവധിയാഘോഷത്തിനിടെയാണ് ഇവർക്ക് ന്യുമോണിയ പിടിപെട്ടതും ആരോഗ്യം ഗുരുതരാവസ്ഥയിലായതും.
“നമ്മുടെ കുംടുംബം അവധിയാഘോഷത്തിനായി ജപ്പാനിൽ എത്തിയിരുന്നു. എന്റെ പ്രിയപ്പെട്ട സഹോദരി, പകർച്ചപനിയ്‌ക്ക് പിന്നാലെ ബാധിച്ച ന്യുമോണിയെ തുടർന്ന് ഞങ്ങളെ വിട്ടുപോയി”—- അഭിനേത്രിയുടെ സഹോദരി ദീ ഹ്സ പറഞ്ഞു.2022-ലാണ് ബാർബി ഹ്സു ഡി.ജെ കൂവിനെ വിവാഹം കഴിക്കുന്നത്.
1998ൽ ഇരുവരും പ്രണയത്തിലായിരുന്നെങ്കിലും വിവിധ കാരണങ്ങളാൽ വേർപിരിഞ്ഞു. പിന്നീട് നടി ചൈനീസ് വ്യവസായിയെ വിവാഹം ചെയ്തു. 11 വർഷത്തിന് ശേഷം ഈ ബന്ധം വിവാഹമോചനത്തിൽ എത്തുകയായിരുന്നു. 2021-ൽ ഇവർ ഡിവോഴ്സായി. രണ്ടുമക്കൾക്കൊപ്പം കഴിഞ്ഞിരുന്ന അവർ ഡിജെ കൂവിനെ 23 വർഷത്തിന് ശേഷം കണ്ടുമുട്ടുകയും പ്രണയത്തിലാവുകയുമായിരുന്നു.
