കട്ടപ്പന: അയല്‍വാസിയിൽ നിന്നും സ്വര്‍ണം മോഷ്ടിച്ച അമ്മയും മകനും അറസ്റ്റില്‍. തമിഴ്നാട് സ്വദേശികളായ മുരുകേശ്വരി രമേശ് , മകന്‍ ശരണ്‍കുമാര്‍ എന്നിവരെയാണ് കട്ടപ്പന പൊലീസ് പിടി കൂടിയത്.
ഇടുക്കിയിലെ കടമാക്കുടിയിൽ വാടകയ്‌ക്ക് താമസിക്കുകയായിരുന്നു പ്രതികൾ. ജനുവരി 23 ന് അടുത്ത വീട്ടുകാർ ചികിത്സയ്‌ക്കായി വീടുവിട്ടു നിന്നിരുന്നു. ഫെബ്രുവരി രണ്ടിന് ആശുപത്രിയിൽ നിന്നും തിരിച്ച് എത്തിയപ്പോഴാണ് അലമാരയില്‍ സൂക്ഷിച്ചിരുന്ന 9.5 പവന്‍ സ്വര്‍ണം മോഷണം പോയ കാര്യം മനസിലാക്കുന്നത്. തുടര്‍ന്ന് പൊലീസില്‍ പരാതി നല്‍കി.
വീട്ടുകാര്‍ പുറത്തുപോവുമ്പോള്‍ താക്കോല്‍ ഒളിപ്പിച്ചു വെക്കുന്ന സ്ഥലം മനസിലാക്കിയ പ്രതികള്‍ സ്വര്‍ണം കൈക്കലാക്കുകയായിരുന്നു. മോഷ്ടിച്ച സ്വര്‍ണം നെടുങ്കണ്ടത്തെ സ്വകാര്യ പണമിടപാട് സ്ഥാപനത്തില്‍ നിന്നും പൊലീസ് കണ്ടെടുത്തു. ഇവിടെ നിന്നും പ്രതികള്‍ നാലു ലക്ഷം രൂപ വാങ്ങിയിരുന്നു.
