തിരുവനന്തപുരം: പിണറായി സർക്കാരിനെതിരെ രൂക്ഷ വിമർശനവുമായി യാക്കോബായ സഭ നിരണം ഭദ്രാസന മുൻ മെത്രാപ്പോലീത്ത ഗീവർഗീസ് മാർകൂറിലോസ്. സമരപരമ്പരകളിലൂടെ അധികാരത്തിൽ വന്ന സിപിഎം ഇപ്പോൾ സമരത്തെ പുച്ഛിക്കുകയാണെന്ന് ഗീവർഗീസ് മാർകൂറിലോസ് പറഞ്ഞു. സെക്രട്ടറിയേറ്റിന് മുന്നിൽ നടക്കുന്ന ആശാവർക്കർമാരുടെ സമരത്തിന് ഐക്യദാർഢ്യം പ്രഖ്യാപിച്ചുകൊണ്ട് സംസാരിക്കുകയായിരുന്നു അദ്ദേഹം.
‘ആശാവർക്കർമാരെ മനുഷ്യരായി പരിഗണിക്കണം. കൊവിഡ് കാലത്ത് ഓടിനടന്ന് ആളുകളെ പരിപാലിച്ചത് ആശാവർക്കർമാരാണ്. കേരളത്തിന്റെ ആരോഗ്യരംഗത്തെ കാലാൾപ്പടയാണ് ആശാവർക്കർമാർ. ഇന്ന് സർക്കാർ അവരെ അവഗണിക്കുന്നു’.
ആരോഗ്യരംഗത്ത് കേരളം ഒന്നാം സ്ഥാനത്താണെന്ന് വിശ്വസിക്കുന്നില്ല. അങ്ങനെ ആയിരുന്ന സമയത്ത് ആശാവർക്കർമാരാണ് അതിന് അടിസ്ഥാനമായിരുന്നത്. ഒരു നിവ‍ൃത്തിയും ഇല്ലാത്തതുകൊണ്ടാണ് ഇവർ സമരവുമായി ഇറങ്ങിയത്. മനുഷ്യനാകണം എന്ന് പാടിയാൽ മാത്രം പോര. മനുഷ്യരായി പരിഗണിക്കുക കൂടി വേണം. ആശാവർക്കർമാരുടെ സമരത്തെ ആർക്കും അവഗണിക്കാനാകില്ലെന്നും ഗീവർഗീസ് മാർകൂറിലോസ് പറഞ്ഞു.
