അമിതവണ്ണത്തിന് (Obesity) എതിരായ പ്രചാരണം നയിക്കാൻ മോഹൻലാലിന്റെ പേര് നിർദ്ദേശിച്ച് പ്രധാനമന്ത്രി നരേന്ദ്രമോദി. ജമ്മുകശ്മീർ മുഖ്യമന്ത്രി ഒമർ അബ്ദുള്ള, വ്യവസായി ആനന്ദ് മഹീന്ദ്ര ഉൾപ്പെടെ പത്ത് പേരേയാണ് ക്യാമ്പയിൻ ശക്തിപ്പെടുത്തുന്നതിനായി നിർദ്ദേശിച്ചത്.
ഭക്ഷ്യ എണ്ണയുടെ ഉപഭോഗം പത്ത് ശതമാനം കുറച്ച് അമിതവണ്ണം നിയന്ത്രിക്കാൻ പ്രധാനമന്ത്രി ആഹ്വാനം ചെയ്തിരുന്നു. കഴിഞ്ഞ ദിവസം പ്രക്ഷേപണം ചെയ്ത പ്രതിമാസ റേഡിയോ പ്രഭാഷണ പരിപാടിയായ മൻ കി ബാത്തിലൂടെയാണ് പ്രധാനമന്ത്രി പ്രചാരണത്തിന് തുടക്കം കുറിച്ചത്. ഇതിന് പിന്നാലെ എക്സിൽ പങ്കുവെച്ച സന്ദേശത്തിലാണ് ആരോഗ്യസംരക്ഷണത്തിൽ ശ്രദ്ധ പുലർത്തുന്ന പത്ത് വ്യക്തിത്വങ്ങളെ പ്രധാനമന്ത്രി നിർദ്ദേശിച്ചത്.
” അമിതവണ്ണത്തിനെതിരായ പോരാട്ടം ശക്തിപ്പെടുത്താനും ഭക്ഷണത്തിലെ ഭക്ഷ്യ എണ്ണ ഉപഭോഗം കുറയ്‌ക്കുന്നതിനെക്കുറിച്ചുള്ള അവബോധം സൃഷ്ടിക്കാൻ താഴെപ്പറയുന്ന ആളുകളെ ഞാൻ നാമനിർദ്ദേശം ചെയ്യാൻ ആഗ്രഹിക്കുന്നു”, പ്രധാനമന്ത്രി എക്സിൽ കുറിച്ചു.
ഭോജ്പുരി ഗായകനും നടനുമായ നീരാഹുവ, ഒളിമ്പ്യൻ മനു ഭാക്കർ, വെയ്റ്റിംഗ് ലിഫ്റ്റ് താരം മീരാഭായി ചാനു, ഇൻഫോസിസ് സഹസ്ഥാപകമായ നന്ദൻ നിലക്കേനി, നടൻ മാധവൻ, ഗായിക ശ്രേയാ ഘോഷാൽ ഒപ്പം സാമൂഹ്യപ്രവർത്തകയും രാജ്യസഭാ എംപിയുമായ സുധാ മൂർത്തി എന്നിവരാണ് പ്രധാനമന്ത്രി നാമനിർദേശം ചെയ്ത മറ്റുള്ളവർ.
