കൊച്ചി: പാര്‍ലമെന്റില്‍ വഖ്ഫ് ഭേദഗതി ബില്ലിനെ അനുകൂലിക്കാത്ത എംപിമാരെ ബഹിഷ്‌കരിക്കാന്‍ ക്രൈസ്തവ സഭകളുടെ കൂട്ടായ്മയായ ആക്ട്‌സ് നേതൃയോഗം ആവശ്യപ്പെട്ടു. മുനമ്പത്ത് വന്ന് തങ്ങള്‍ക്ക് പിന്തുണ അറിയിച്ചവര്‍ പാര്‍ലമെന്റിലും ആ നിലപാട് സ്വീകരിക്കണമെന്നാണ് ആക്ട്‌സ് ആവശ്യപ്പെടുന്നത്. ആ നിലപാടനുസരിച്ചായിരിക്കും അവരോടുള്ള ഭാവി സമീപനമെന്ന് ജനറല്‍ സെക്രട്ടറി ജോര്‍ജ് സെബാസ്റ്റ്യന്‌റെ അധ്യക്ഷതയില്‍ ചേര്‍ന്ന യോഗം വ്യക്തമാക്കി. പാര്‍ലമെന്റില്‍ വഖഫ് ഭേദഗതി ബില്‍ അവതരിപ്പിക്കുന്ന ദിവസം പ്രാര്‍ത്ഥനാദിനമായി ആചരിക്കുമെന്നും ജോര്‍ജ് അറിയിച്ചു.
ബില്‍ പാര്‍ലമെന്റില്‍ ചര്‍ച്ചയ്‌ക്ക് വരുമ്പോള്‍ അന്യായമായ വകുപ്പുകള്‍ ഭേദഗതി ചെയ്യുന്നതിന് അനുകൂലമായി ജനപ്രതിനിധികള്‍ വോട്ട് ചെയ്യണമെന്ന് നേരത്തെ കെസിബിസിയും ആവശ്യപ്പെട്ടിരുന്നു.
