ബേസിൽ ജോസഫിന്റെ ഏറ്റവും പുതിയ ചിത്രമായ മരണമാസിന് ക്ലീൻ യുഎ സർട്ടിഫിക്കറ്റ്. നവാഗതനായ ശിവ പ്രസാദ് സംവിധാനം ചെയ്യുന്ന ചിത്രം ടൊവിനോ തോമസ് പ്രൊഡക്ഷൻസ്’, റാഫേൽ ഫിലും പ്രൊഡക്ഷൻസ്, വേൾഡ് വൈൾഡ് ഫിലിംസ് എന്നീ ബാനറുകളിൽ ടൊവിനോ തോമസ്, ടിങ്സ്റ്റൺ തോമസ്, റാഫേൽ പൊഴാലിപ്പറമ്പിൽ, തൻസീർ സലാം, എന്നിവർ ചേർന്ന് നിർമ്മിക്കുന്നു. ഏപ്രിൽ പത്തിന് തിയേറ്ററിലെത്തും. ഗോകുൽനാഥാണ് എക്സിക്കുട്ടീവ് പ്രൊഡ്യൂസർ. കേരളത്തെ നടുക്കിയ സീരിയൽ കില്ലറിന്റെ കൊലപാതക പരമ്പരയെന്ന് അവകാശപ്പെട്ടു കൊണ്ട് അരങ്ങേറുന്ന ചില സംഭവങ്ങൾ ഡാർക്ക് ഹ്യൂമർ ജോണറിൽ അവതരിപ്പിക്കുകയാണ് ശിവപ്രസാദ് ഈ ചിത്രത്തിലൂടെ.
യൂത്തിന്റെ കാഴ്ചപ്പാടുകൾക്കൊപ്പം സഞ്ചരിക്കുന്ന ഈ ചിത്രം ചിരിയും ചിന്തയും നൽകുന്ന ഒരു ദൃശ്യാനുഭവം തന്നെയാകുമെന്നാണ് അണിയറക്കാരുടെ അവകാശവാദം. സുരേഷ് കൃഷ്ണ, ബാബു ആൻ്റണി, സിജു സണ്ണി, രാജേഷ് മാധവൻ, പുലിയാനം പൗലോസ് എന്നിവരും പ്രധാന താരങ്ങളാണ്. അനിഷ്മ അനിൽകുമാറാണ് നായിക.സിജു സണ്ണിയുടെ കഥക്ക് സിജു സണ്ണിയും, ശിവപ്രസാദും ചേർന്ന് തിരക്കഥ രചിച്ചിരിക്കുന്നു. വരികൾ-മൊഹ്സിൻ പെരാരി.സംഗീതം – ജയ് ഉണ്ണിത്താൻ.ഛായാഗ്രഹണം – നീരജ് രവി.എഡിറ്റിംഗ് – ചമൻ ചാക്കോ ‘പ്രൊഡക്ഷൻ ഡിസൈനർ – മാനവ് സുരേഷ്.
