എണ്ണ മുതല്‍ ടെലികോം വരെയുള്ള വ്യവസായങ്ങളില്‍ പടര്‍ന്ന് പന്തലിച്ച് നില്‍ക്കുന്ന മുകേഷ് അംബാനിയുടെ റിലയന്‍സ് ഇന്‍ഡസ്ട്രീസിന്റെ നാലാം പാദലാഭത്തില്‍ കുതിപ്പ്. ജനുവരി-മാര്‍ച്ച് പാദത്തില്‍ 19407 കോടി രൂപയുടെ അറ്റാദായമാണ് റിലയന്‍സ് നേടിയത്. 2.41 ശതമാനം വര്‍ധനയോടെയാണിത്.
റീട്ടെയില്‍ ബിസിനസ് ഗംഭീര തിരിച്ചുവരവ് നടത്തിയതും എണ്ണ വ്യവസായം ആഗോളതലത്തിലെ തിരിച്ചടികളെ അതിജീവിച്ച് കുതിച്ചതുമാണ് ഗ്രൂപ്പിന്റെ മൊത്തം ലാഭത്തില്‍ നിഴലിച്ചത്.
പ്രതിഓഹരിക്ക് 14.34 രൂപയന്ന നിലയിലാണ് റിലയന്‍സിന്റെ അറ്റലാഭം. മുന്‍വര്‍ഷം ഇതേ സാമ്പത്തികപാദത്തില്‍ കമ്പനിയുടെ അറ്റാദായം 18951 കോടി രൂപയായിരുന്നു. പ്രതിഓഹരിക്ക് 14 രൂപയായിരുന്നു അറ്റലാഭം.
ഒക്‌റ്റോബര്‍-ഡിസംബര്‍ പാദത്തിലും റിലയന്‍സിന്റെ ലാഭത്തില്‍ വലിയ വര്‍ധനയുണ്ടായിരുന്നു. 18,540 കോടി രൂപയായിരുന്നു ലാഭം. പ്രവര്‍ത്തനങ്ങളില്‍ നിന്നുള്ള വരുമാനം 2.6 ലക്ഷം കോടി രൂപയാണ്. മുന്‍വര്‍ഷം മാര്‍ച്ച് പാദത്തില്‍ ഇത് 2.4 ലക്ഷം കോടി രൂപയായിരുന്നു.
വിപണി മൂല്യത്തിന്റെ അടിസ്ഥാനത്തില്‍ രാജ്യത്തെ ഏറ്റവും വലിയ കമ്പനിയായ റിലയന്‍സ് 5.5 രൂപയുടെ ലാഭവിഹിതവും 2025 സാമ്പത്തികവര്‍ഷത്തില്‍ പ്രഖ്യാപിച്ചിട്ടുണ്ട്.
