ന്യൂഡെല്‍ഹി: മുകേഷ് അംബാനിയുടെ റിലയന്‍സ് ഇന്‍ഡസ്ട്രീസ് ഈ വര്‍ഷം സോളാര്‍ ഫോട്ടോവോള്‍ട്ടെയ്ക് മൊഡ്യൂളുകള്‍ നിര്‍മിക്കുന്ന ഫാക്ടറി ആരംഭിക്കുമെന്ന് കമ്പനി വ്യക്തമാക്കി.
സംശുദ്ധ ഊര്‍ജ്ജ ആവശ്യകതകള്‍ നിറവേറ്റുന്നതിനായി സോളാര്‍ മൊഡ്യൂളുകള്‍ ഉല്‍പ്പാദിപ്പിക്കുന്നതിനായി മൂന്ന് വലിയ ഫാക്ടറികള്‍ നിര്‍മ്മിച്ചു വരികയാണെന്ന് റിലയന്‍സ് ഇന്‍ഡസ്ട്രീസിലെ സ്ട്രാറ്റജി ആന്‍ഡ് ഇനിഷ്യേറ്റീവ്‌സ് വിഭാഗം പ്രസിഡന്റ് പാര്‍ത്ഥ എസ് മൈത്ര പറഞ്ഞു. ഇതില്‍ ആദ്യത്തെ ഫാക്ടറി ഗുജറാത്തിലെ ജാംഗനറില്‍ ചെറിയ കപ്പാസിറ്റിയില്‍ പ്രവര്‍ത്തനം ആരംഭിച്ചു കഴിഞ്ഞു.
സോളാര്‍ മൊഡ്യൂള്‍ ശേഷി പ്രതിവര്‍ഷം 20 ജിഗാവാട്ടായി ഉയര്‍ത്താനാണ് റിലയന്‍സ് ലക്ഷ്യമിടുന്നതെന്ന് മൈത്ര പറഞ്ഞു. ബാറ്ററി, മൈക്രോ-പവര്‍ ഇലക്ട്രോണിക്‌സ് ഫാക്ടറി അടുത്ത വര്‍ഷം ആരംഭിക്കുമെന്ന് അദ്ദേഹം പറഞ്ഞു.
‘അത് സംഭവിച്ചാല്‍ ലോകത്തിലെ രണ്ടാമത്തെ വലിയ സോളാര്‍ പിവി നിര്‍മ്മാതാക്കളായി ഞങ്ങള്‍ മാറും. മൊത്തം സോളാര്‍ പിവി മൊഡ്യൂളുകളുടെ ഏകദേശം 14% ചൈനയ്‌ക്ക് പുറത്തായിരിക്കും ഞങ്ങള്‍ നിര്‍മ്മിക്കുന്നത്,’ മൈത്ര പറഞ്ഞു.
ഇന്ത്യയുടെ സംശുദ്ധ ലക്ഷ്യം
സംശുദ്ധ ഊര്‍ജ്ജ ലക്ഷ്യങ്ങള്‍ കൈവരിക്കാന്‍ ശ്രമിക്കുന്ന ഇന്ത്യക്ക് റിലയന്‍സിന്റെ സോളാര്‍ നിര്‍മാണ സംരംഭങ്ങള്‍ കരുത്താകുമെന്ന് വിലയിരുത്തപ്പെടുന്നു. കഴിഞ്ഞ ഒരു വര്‍ഷമായി ഈ മേഖലയില്‍ നിക്ഷേപം വര്‍ദ്ധിച്ചിട്ടുണ്ട്. എന്നാല്‍ 2030 ഓടെ 500 ജിഗാവാട്ട് ഫോസില്‍ ഇതര വൈദ്യുതി ശേഷി എന്ന ലക്ഷ്യം കൈവരിക്കുന്നതിന് അടുത്ത അഞ്ച് വര്‍ഷത്തിനുള്ളില്‍ ശേഷി ഗണ്യമായി വര്‍ദ്ധിപ്പിക്കേണ്ടതുണ്ട് എന്ന് ഗ്ലോബല്‍ എനര്‍ജി മോണിറ്റര്‍ റിപ്പോര്‍ട്ട് സൂചിപ്പിക്കുന്നു.
