കൊച്ചി : റോഡിലേയ്ക്ക് വീണ വൈദ്യുതി തൂണിലിടിച്ച് ബൈക്ക് യാത്രക്കാരനായ ഉസ്താദ് മരിച്ചു. ഇതേ പോസ്റ്റിലിടിച്ച് വാഹനം മറിഞ്ഞ് ക്ഷേത്രപൂജാരിക്കും പരുക്കേറ്റു. കുമ്പളം നോർത്ത് പള്ളിയിലെ ഉസ്താദ് അബ്ദ്ദൾ ഗഫൂറാണ് മരിച്ചത്. ഇന്ന് പുലർച്ചെ കുമ്പളം പി.ഡബ്ല്യു.ഡി റോഡിൽ പ്രണവം ബസ് സ്റ്റോപ്പിനടുത്തായിരുന്നു അപകടം.
രാവിലെ പള്ളിയിലേയ്‌ക്കെത്തിയ ഉസ്താദിന്റെ ബൈക്ക് റോഡിന് കുറുകെ കിടന്ന പോസ്റ്റിലിടിക്കുകയായിരുന്നു. ഗുരുതര പരുക്കേറ്റ് വഴിയിൽ വീണ് കിടന്ന അബ്ദുൾ ഗഫൂറിനെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. അവിടെ അടുത്തുള്ള വീട്ടിലേയ്‌ക്ക് വൈദ്യുതി എത്തിക്കാനായി രണ്ടാഴ്ച മുൻപ് സ്ഥാപിച്ച പോസ്റ്റാണ് മഴയെ തുടർന്ന് മറിഞ്ഞു വീണത്.
പുലർച്ചെ ക്ഷേത്രത്തിലേയ്‌ക്ക് പോയ ശാന്തി കുമ്പളം കൊട്ടാരത്തിൽ സുരേഷിന്റെ വാഹനവും പോസ്റ്റിലിടിച്ച് മറിയുകയായിരുന്നു. പരുക്കേറ്റ സുരേഷിനെ നെട്ടൂരിലെ സ്വകാര്യ ആശുപത്രിയിൽ പ്രവേശിപ്പിച്ചു.
