ചെന്നൈ: ലഹരിക്കേസിൽ അറസ്റ്റിലായ നടൻ ശ്രീകാന്തിന്റെ സുഹൃത്തും നടനുമായ കൃഷ്ണ കേരളത്തിൽ ഒളിവിൽ കഴിയുകയാണെന്ന് സൂചന. കോളിവുഡിൽ സജീവമായി നിൽക്കുന്ന ചില നടിമാരെ കേന്ദ്രീകരിച്ചും അന്വേഷണം നടക്കുന്നുണ്ടെന്ന് പൊലീസ് അറിയിച്ചു. ശ്രീകാന്തിനെ കൂടാതെ നടൻ കൃഷ്ണയ്‌ക്കും കൊക്കെയ്ൻ കൈമാറിയെന്ന ഇടപാടുകാരന്റെ മൊഴിയുടെ അടിസ്ഥാനത്തിലാണ് നിലവിൽ അന്വേഷണം നടക്കുന്നത്.
ഒളിവിൽ പോയ കൃഷ്ണയെ കണ്ടെത്തുന്നതിന് കേരളത്തിലും മറ്റ് അയൽസംസ്ഥാനങ്ങളിലേക്കും അന്വേഷണം വ്യാപിപ്പിക്കാനാണ് പൊലീസിന്റെ തീരുമാനം. താരത്തിന്റെ മൊബൈൽ ഫോൺ ഓഫാണ്. അഞ്ച് പ്രത്യേക സംഘങ്ങളായി തിരിഞ്ഞാണ് അന്വേഷണം നടക്കുന്നത്. കൃഷ്ണ കേരളത്തിലുണ്ടെന്ന നിഗമനത്തിലാണ് പൊലീസ്. ഇയാളുമായി ബന്ധമുള്ള ആളുകളെ കണ്ടെത്തിയായിരിക്കും തുടർ അന്വേഷണം നടക്കുക.
കോളിവുഡ് സിനിമാലോകത്തെ പിടിച്ചുകുലുക്കിയ സംഭവമായിരുന്നു നടൻ ശ്രീകാന്തിന്റെ അറസ്റ്റ്. പിന്നാലെ കൃഷ്ണയും പ്രതിക്കൂട്ടിലാവുകയായിരുന്നു. ഇയാളെ കണ്ടെത്തി ചോദ്യം ചെയ്താൽ മാത്രമേ കൂടുതൽ താരങ്ങളുടെ പങ്ക് കണ്ടെത്താനാകൂ.
കൊക്കെയ്ൻ കൈവശം വച്ചതിന് അറസ്റ്റിലായ ലഹരി ഇടപാടുകാരനെ ചോദ്യം ചെയ്തതിന്റെ അടിസ്ഥാനത്തിൽ, തമിഴ് സിനിമയിലെ പല നടന്മാരും നടികളും ലഹരി ഉപയോഗിക്കുന്നുണ്ടെന്നാണ് വിവരം. ശ്രീകാന്ത് പല താരങ്ങൾക്കും കൊക്കെയ്ൻ കൈമാറിയിട്ടുണ്ടെന്നും കണ്ടെത്തിയിട്ടുണ്ട്.
