പ്രവീൺ നാരായണൻ സംവിധാനം ചെയ്ത ചിത്രം ലൈംഗീക അതിക്രമത്തിനിരയായതിന് ശേഷം നീതിക്കായി പോരാട്ടം നടത്തുന്ന ജാനകി എന്ന പെൺകുട്ടിയുടെ കഥയാണ് പറയുന്നത്. ചിത്രം വ്യാഴാഴ്ചയാണ് തീയേറ്ററുകളിലെത്തിയത്. അവഹേളിക്കപ്പെട്ട ഒരു സ്ത്രീയുടെ നിലക്കാത്ത പോരാട്ട വീര്യമാണ് കഥയിലുടനീളം കാണിക്കുന്നത്. കേരള സര്ക്കാറിനെ പ്രതിയാക്കിയുള്ള കേസ് എന്ന നിലയില് വ്യത്യസ്തമായൊരു കാഴ്ചപ്പാട് കൂടി സംവിധായകൻ സിനിമയിലൂടെ അവതരിപ്പിച്ചിട്ടുണ്ട്.
അഡ്വ. ഡേവിഡ് ആബേല് എന്ന തീപ്പൊരി അഭിഭാഷകനായാണ് ചിത്രത്തിൽ സുരേഷ് ഗോപി എത്തിയിരിക്കുന്നത്. ഏറെ നാളുകൾക്ക് ശേഷം സൂപ്പർസ്റ്റാർ സുരേഷ് ഗോപിയുടെ ‘മാസ്സ് അപ്പീൽ’ തന്നെയാണ് ചിത്രത്തിന്റെ ഹൈലൈറ്റ്. ഒരു ലീഗൽ/കോർട്ട് റൂം ത്രില്ലർ എന്ന ഗണത്തിൽ വരുന്ന ചിത്രം പ്രേക്ഷകരെ ആദ്യവസാനം പിടിച്ചിരുത്തുന്ന തരത്തിൽ തന്നെയാണ് ഒരുക്കിയിരിക്കുന്നത്.ആക്ഷൻ, ത്രിൽ, വൈകാരിക മുഹൂർത്തങ്ങൾ, നിയമ പോരാട്ടം എന്നിവക്കെല്ലാം ഈ ചിത്രത്തിൽ തുല്യ പ്രാധാന്യവും കൊടുത്തിട്ടുണ്ട്.
ടൈറ്റിൽ കഥാപാത്രമായ ജാനകിയായി എത്തിയ അനുപമ പരമേശ്വരന്റെ മിന്നുന്ന പ്രകടനമാണ് ചിത്രത്തിന്റെ നിർണ്ണായകമായ കുന്തമുന.
ദിവ്യ പിള്ളൈ, ശ്രുതി രാമചന്ദ്രൻ എന്നിവരുടെ കഥാപാത്രങ്ങളും ശ്രദ്ധ നേടുന്നുണ്ട്.
അസ്കർ അലി, മാധവ് സുരേഷ് ഗോപി, ബൈജു സന്തോഷ്, ജയൻ ചേർത്തല, ജോയ് മാത്യു, അഭിലാഷ് രവീന്ദ്രൻ, രജിത് മേനോൻ, നിസ്താർ സേട്ട്, വൈഷ്ണവി രാജ്, മേധ പല്ലവി, കോട്ടയം രമേഷ്, ദിലീപ്, ബാലാജി ശർമ എന്നിവരും സൂപ്പറായി എന്നാണ് പ്രേക്ഷക മതം. സംവിധായകനായ പ്രവീൺ നാരായണന്റെ തന്നെ ശക്തമായ തിരക്കഥയും സിനിമയെ കൂടുതൽ മികച്ചതാക്കി.
