കർണാടക: വി ഐ പി യാത്രകളിൽ സൈറണുകൾ നിരോധിച്ച് കർണാടക. ആംബുലൻസുകൾ, പൊലീസ്, ഫയർസർവീസുകൾ എന്നിവയ്ക്ക് മാത്രമേ ഇനി സൈറണുകൾ ഉപയോഗിക്കാൻ അനുവാദമുള്ളൂവെന്നും എന്നാൽ അടിയന്തിര സാഹചര്യങ്ങളിൽ സൈറണുകൾ ഉപയോഗിക്കാമെന്നും ഡിജിപി എം എ സലീം പറഞ്ഞു.
പൊതുസുരക്ഷയും ശബ്ദനിയന്ത്രണവും ഉറപ്പാക്കുന്നതിനായാണ് സൈറണുകൾക്ക് നിരോധനം കൊണ്ടുവന്നത്. സൈറണുകൾ ഗതാഗതത്തെ തടസപ്പെടുത്തുന്നു. മാത്രവുമല്ല, വിഐപി വാഹനവ്യൂഹങ്ങളുടെ സഞ്ചാരം മനസിലാക്കുന്നത് വഴി ഭീഷണികൾക്ക് കാരണമാകുന്നുവെന്നും കൃത്യമല്ലാത്ത എസ്കോർട്ട് ഡ്രൈവിംഗ് അപകട സാധ്യത വർദ്ധിപ്പിക്കുന്നുവെന്നും കണ്ടെത്തിയാണ് ഇത്തരമൊരു നീക്കം. ഇത് പൊതുജനങ്ങൾക്ക് തടസം ഉണ്ടാകാതിരിക്കാൻ സഹായിക്കുമെന്ന് അധികൃതർ അറിയിച്ചു.
കഴിഞ്ഞ ശനിയാഴ്ച ഉപമുഖ്യമന്ത്രി ഡി കെ ശിവകുമാറിന്റെ എസ്കോർട്ട് വാഹനം മറിഞ്ഞ് നാല് പേർക്ക് പരിക്കേറ്റിരുന്നു. മൈസൂരുവിൽ നടന്ന കൺവെൻഷനിൽ പങ്കെടുത്ത് മടങ്ങവെയായിരുന്നു അപകടം. ഡ്രൈവർക്ക് നിയന്ത്രണം നഷ്ടപ്പെട്ടതിനെ തുർന്നാണ് വാഹനം മറിഞ്ഞത്. ഇതിന് പിന്നാലെയാണ് മാറ്റം.
