ശ്രീനഗർ: അതിർത്തിയിൽ വീണ്ടും പാക് പ്രകോപനം. കശ്മീരിൽ പൂഞ്ച് സെക്ടറിലാണ് വെടിവയ്പ്പുണ്ടായത്. വെടിനിർത്തൽ കരാർ ലംഘിച്ചുകൊണ്ടാണ് പാക് സൈന്യം ഇന്ത്യൻ അതിർത്തിയിൽ വെടിയുതിർത്തത്. പാക് സൈന്യത്തിന്റെ പ്രകോപനകരമായ നീക്കത്തിനെതിരെ ഇന്ത്യൻ സൈന്യം ശക്തമായി തിരിച്ചടിച്ചു.
നിയന്ത്രണരേഖയിലെ ഇന്ത്യൻ പോസ്റ്റുകൾക്ക് നേരെയാണ് വെടിയുതിർത്തത്. 15 മിനിറ്റോളം വെടിവയ്പ് നീണ്ടുനിന്നുവെന്ന് സൈന്യം അറിയിച്ചു. യാതൊരു പ്രകോപനവുമില്ലാതെ ഇന്ത്യൻ ചെക്ക്പോസ്റ്റിന് നേരെ പാക് സൈന്യം വെടിയുതിർക്കുകയായിരുന്നു.
കഴിഞ്ഞ ദിവസം പൂഞ്ച് സെക്ടറിൽ അതിർത്തി വഴി നുഴ‍ഞ്ഞുകയറാൻ ശ്രമിച്ച ഭീകരരുമായി സൈന്യം ഏറ്റുമുട്ടിയിരുന്നു. സംഭവം കഴിഞ്ഞ് രണ്ട് ദിവസത്തിന് ശേഷമാണ് പൂഞ്ച് സെക്ടറിൽ പാക് പ്രകോപനമുണ്ടായത്. ആളപായമൊന്നും റിപ്പോർട്ട് ചെയ്തിട്ടില്ല. വെടിവയ്പിന്റെ മറവിൽ അതിർത്തി കടക്കാനുള്ള ശ്രമങ്ങൾ നേരത്തെ നടന്നിട്ടുണ്ട്. ഇതിന്റെ പശ്ചാത്തലത്തിൽ സുരക്ഷാസേന തെരച്ചിൽ ശക്തമാക്കി.
