തിരുവനന്തപുരം: മുൻ എക്‌സൈസ് കമ്മിഷണ‍ർ മഹിപാൽ യാദവ് അന്തരിച്ചു. മസ്‌തിഷ്‌ക അർബുദത്തെ തുടർന്ന് രാജസ്ഥാനിൽ ചികിത്സയിലായിരുന്നു. ഈ മാസം അവസാനം വിരമിക്കാൻ ഇരിക്കെയാണ് അദ്ദേഹത്തിന്റെ വിയോഗം. എഡിജിപി റാങ്കിലുള്ള ഉദ്യോഗസ്ഥനായ അദ്ദേഹം കഴിഞ്ഞ ജൂണിലാണ് എക്‌സൈസ് കമ്മിഷണറായി ചുമതലയേറ്റത്. ബ്രെയിൻ ട്യൂമർ സ്ഥിരീകരിച്ചതോടെ ജൂലൈ അവസാനം അദ്ദേഹം അവധിയിൽ പ്രവേശിച്ചു.
1997 ബാച്ച് ഐപിഎസ് ഉദ്യോഗസ്ഥനാണ്. ഇടയ്‌ക്ക് കേന്ദ്ര ഡെപ്യൂട്ടേഷനിൽ പോയെങ്കിലും പിന്നീട് കേരളത്തിലേക്ക് മടങ്ങിയെത്തി. 2013ൽ വിശിഷ്‌ട സേവനത്തിനുള്ള രാഷ്‌ട്രപതിയുടെ മെഡൽ നേടിയിട്ടുണ്ട്. എറണാകുളം ഐജി, ബിവറേജസ് കോർപറേഷൻ എംഡി എന്നിങ്ങനെ പദവികളും അദ്ദേഹം വഹിച്ചിട്ടുണ്ട്.
