മുല്ലപ്പൂ കൈവശം വച്ചതിവ് നടി നവ്യ നായരിൽ നിന്നും ഓസ്ട്രേലിയ ഫൈൻ ഈടാക്കിയത് കഴിഞ്ഞ ദിവസമാണ്. മെല്‍ബണ്‍ രാജ്യാന്തര വിമാനത്താവളത്തിലായിരുന്നു സംഭവം. ഒന്നേകാൽ ലക്ഷത്തോളം രൂപയാണ് നടിക്ക് പിഴയായി ഒടുക്കേണ്ടി വന്നത്. സംഭവം വൈറലായതിന് പിന്നാലെ ഫൈനിന് കാരണക്കാരനായ മുല്ലപ്പൂവിന്റെ ദൃശ്യങ്ങൾ പങ്കുവച്ചിരിക്കുകയാണ് നടി. എയര്‍പോര്‍ട്ടില്‍ നിന്നടക്കമുള്ള തന്റെ ദൃശ്യങ്ങള്‍ കൊർത്തിണക്കി കൊണ്ടാണ് റീൽസ് ചെയ്തിരിക്കുന്നത്. കേരള സാരിയുടുത്ത് തലയില്‍ മുല്ലപ്പൂ ചൂടിയാണ് നവ്യയുടെ ഫ്ലെറ്റ് യാത്ര. ‘ഫൈൻ അടിക്കുന്നതിന് തൊട്ടുമുന്‍പുള്ള പ്രഹസനം’ എന്നാണ് പോസ്റ്റിന് ക്യാപ്ഷന്‍ നല്‍കിയിരിക്കുന്നത്.
നിരവധി പേരാണ് പോസ്റ്റിന് താഴെ രസകരമായ കമൻറിട്ടിരിക്കുന്നത്. ‘ഐ എം ഫൈൻ, താങ്ക്യൂ’ എന്നായിരുന്നു നടൻ രമേഷ് പിഷാരടി കുറിച്ചത്. ‘അടുത്ത പിഎസ്സി ചോദ്യം: മുല്ലപ്പൂ വച്ചതിന് ഏറ്റവും വലിയ ഫൈൻ കിട്ടിയ മലയാള നടി ആര്’ തുടങ്ങി വറൈറ്റി കമൻറുകളും കൂട്ടത്തിലുണ്ട്.
വിക്ടോറിയയിലെ മലയാളി അസോസിയേഷന്റെ ഓണപ്പരിപാടിയില്‍ പങ്കെടുക്കാനായാണ് നവ്യ ഓസ്ട്രേലിയയിൽ എത്തിയത്. ഓണപ്പരിപാടിയില്‍ പ്രസംഗിക്കവെ നടി തന്നെയാണ് ഫൈനടിച്ച കാര്യം വെളിപ്പെടുത്തിയത്. 15 സെന്റിമീറ്റര്‍ നീളമുള്ള മുല്ലപ്പൂവാണ് തന്റെ പക്കല്‍ ഉണ്ടായിരുന്നത്. അച്ഛനാണ് വിമാനം കയറുന്നതിന് മുമ്പ് മുല്ലപ്പൂവ് വാങ്ങിത്തന്നത്. മുല്ലപ്പൂ രണ്ട് കഷ്ണങ്ങളാക്കി മുറിച്ച് ഒന്ന് ഹാൻഡ് ബാഗിൽ വച്ചു. മറ്റേത് തലയിൽ ചൂടി. ഒരു ക്യാരിബാഗിലാക്കിയാണ് മുല്ലപ്പൂ ഹാന്‍ഡ് ബാഗില്‍ വച്ചതെന്നും നവ്യ പറയുന്നു. മുല്ലപ്പൂവ് കൊണ്ടുപോകാന്‍ പാടില്ല എന്ന നിയമം തനിക്ക് അറിയില്ലായിരുന്നു എന്നും നടി കൂട്ടിച്ചേ‍ർത്തിരുന്നു.
ഓസ്‌ട്രേലിയയുടെ ജൈവസുരക്ഷാ നിയമപ്രകാരമാണ് നവ്യയിൽ നിന്നും പിഴ ഈടാക്കിയത്. വിദേശത്ത് നിന്നുള്ള ചെടികൾ, പൂക്കൾ എന്നിവയ്‌ക്ക് ഓസ്ട്രേലിയയിൽ വിലക്കുണ്ട്..
