സോഷ്യൽമീഡിയ ഉപയോഗം പൂർണമായും ഉപേക്ഷിച്ച് നടി ഐശ്വര്യ ലക്ഷ്മി. ഇൻസ്റ്റഗ്രാമിൽ പങ്കുവച്ച കുറിപ്പിലൂടെയാണ് താരം ഇക്കാര്യം അറിയിച്ചത്. സിനിമാ മേഖലയിൽ പിടിച്ചുനിൽക്കണമെങ്കിൽ സോഷ്യൽമീഡിയയിൽ സജീവമാകണമെന്ന് താൻ വിചാരിച്ചിരുന്നുവെന്നും എന്നാൽ ചെറിയ സന്തോഷങ്ങളെ പോലും ഇല്ലാതാക്കുകയാണ് ചെയ്തതെന്നും ഐശ്വര്യ ലക്ഷ്മി പോസ്റ്റിൽ കുറിച്ചു.
“ഈ മേഖലയിൽ നിലനിൽക്കാൻ സോഷ്യൽമീഡിയ അത്യാവശ്യമാണെന്ന് ഏറെക്കാലമായി ഞാൻ വിശ്വസിച്ചിരുന്നു. കാലത്തിനനുസരിച്ച് സഞ്ചരിക്കേണ്ടത് അത്യാവശ്യമാണെന്ന് കരുതി. എനിക്ക് സഹായകമാകുമെന്ന കരുതിയ കാര്യം എനിക്ക് നേരെ തിരിഞ്ഞു. എന്റെ ജോലിയിൽ നിന്നും എന്റെ ശ്രദ്ധതിരിച്ചുവിട്ടു. എന്റെ എല്ലാ ചിന്തകളെയും ഇല്ലാതാക്കി. ചെറിയ സന്തോഷങ്ങൾ പോലും നഷ്ടമായി. എന്നിലെ കലാകാരിക്കും ആ കൊച്ചുകുട്ടിക്കും വേണ്ടി ഞാൻ ശരിയായ കാര്യം ചെയ്യുന്നു. തനിമയോടെ നിലനിർത്തിക്കൊണ്ട് ഇന്റർനെറ്റിൽ നിന്ന് പൂർണമായി അപ്രത്യക്ഷമാകാൻ ഞാൻ ആഗ്രഹിക്കുന്നു. ജീവിതത്തിൽ കൂടുതൽ ബന്ധങ്ങളും സിനിമകളും ഉണ്ടാകാൻ സാധിക്കുമെന്ന് പ്രതീക്ഷിക്കുന്നു” ഐശ്വര്യ ലക്ഷ്മി കുറിച്ചു.
