ലക്നൗ: ആത്മനിർഭർ ഭാരതത്തിന് കീഴിൽ ഉത്തർപ്രദേശിലെ ലക്നൗവിൽ നിർമിച്ച ബ്രഹ്മോസ് മിസൈൽ പ്രവർത്തനത്തിന് സുസജ്ജം. ലക്നൗ പ്ലാന്റിൽ നിർമിച്ച മിസൈലിന്റെ ആദ്യ ബാച്ച് ഒക്ടോബർ 18-നാണ് പ്രതിരോധ മേഖലയ്ക്ക് കൈമാറുന്നത്. പ്രതിരോധമന്ത്രി രാജ്നാഥ് സിംഗും ഉത്തർപ്രദേശ് മുഖ്യമന്ത്രി യോഗി ആദിത്യനാഥും ചേർന്ന് ഫ്ലാഗ് ഓഫ് നിർവഹിക്കുന്നത്.
ലക്നൗ പ്ലാന്റിൽ പ്രതിവർഷം 80-100 മിസൈലുകൾ ഉത്പാദിപ്പിക്കുന്നു. ഇന്ത്യൻ സായുധസേനയുടെ ശക്തി വർദ്ധിപ്പിക്കുക മാത്രമല്ല, രാജ്യത്തിന്റെ പ്രതിരോധ നിർമാണ അടിത്തറ ശക്തിപ്പെടുത്തുന്നതിനും സാധ്യതയുള്ള കയറ്റുമതികളെ പിന്തുണക്കുന്നതിനുമാണ് പ്ലാന്റ് നിർമിച്ചിരിക്കുന്നത്.
ഇന്ത്യയുടെ ഡിആർഡിഒയും റഷ്യയുടെ എൻപിഒ മഷിനോസ്ട്രോയേനിയയും ചേർന്നുള്ള സംയുക്ത സംരംഭമാണ് ബ്രഹ്മോസ്. 290 മുതൽ 400 കിലോമീറ്റർ വരെ ദൂരത്തിൽ വേഗതയിൽ പ്രഹരശേഷി ഇവയ്ക്കുണ്ട്. അത്യാധുനിക സംവിധാനങ്ങളോടെയാണ് ലക്നൗ പ്ലാന്റ് സജ്ജമാക്കിയിരിക്കുന്നത്. നൂറുക്കണക്കിന് തൊഴിലവസരങ്ങൾ ഇതിലൂടെ സൃഷ്ടിക്കപ്പെടും. എഞ്ചിനീയർമാർ, ടെക്നീഷ്യന്മാർ ഉൾപ്പെടെ നിരവധി പേരെ നിയമിക്കും.
രാജ്യത്തിന്റെ പ്രതിരോധ ശേഷി ശക്തിപ്പെടുത്തുന്നതിനും ആത്മനിർഭർ ഭാരത് എന്ന ലക്ഷ്യം കൈവരിക്കുന്നതിനുമുള്ള ഇന്ത്യയുടെ നിർണായക ചുവടുവയ്പ്പാണിത്.
