2023-ലെ ദ്വിവത്സര സോഫ്റ്റി അവാർഡിന് അർഹനായി ഡോ. ജെ. കെ. ജെന. ന്യൂഡൽഹിയിലെ ഇന്ത്യൻ കൗൺസിൽ ഓഫ് അഗ്രികൾച്ചറൽ റിസർച്ച് (ഐസിഎആർ) ഡെപ്യൂട്ടി ഡയറക്ടർ ജനറൽ (ഫിഷറീസ് സയൻസ്) ഡോ. ജെ. കെ. ജെനയെ സൊസൈറ്റി ഓഫ് ഫിഷറീസ് ടെക്നോളജിസ്റ്റുകൾ (ഇന്ത്യ) ദ്വിവത്സരമായി നൽകുന്ന സോഫ്റ്റി അവാർഡ് 2023-ന് തെരഞ്ഞെടുത്തു.
മത്സ്യഗവേഷണ മേഖലയിൽ 33 വർഷത്തിലേറെ ഗവേഷണ-ഭരണ പരിചയമുള്ള ഡോ. ജെന, രാജ്യത്തുടനീളമുള്ള മത്സ്യ ഗവേഷണ-വികസന സംരംഭങ്ങൾക്ക് നേതൃത്വം നൽകുന്നതിൽ നിർണായക പങ്ക് വഹിച്ചിട്ടുണ്ട്. അക്വാകൾച്ചർ, സംരക്ഷണ ജനിതകശാസ്ത്രം എന്നീ മേഖലകളിലെ അദ്ദേഹത്തിന്റെ ശ്രദ്ധേയമായ സംഭാവനകൾ ഇന്ത്യയുടെ മത്സ്യബന്ധന മേഖലയെ ഗണ്യമായി മുന്നോട്ട് നയിച്ചിട്ടുണ്ട്.
തീവ്ര-കരിമീൻ കൃഷി, അക്വാകൾച്ചർ അടിസ്ഥാനമാക്കിയുള്ള ഗാർഹിക മലിനജല സംസ്കരണം, ക്രയോപ്രിസർവേഷൻ, സംരക്ഷണ ജനിതകശാസ്ത്രം, പ്രായോഗിക മത്സ്യ-പോഷകാഹാരം എന്നിവയുൾപ്പെടെ വിവിധ സാങ്കേതികവിദ്യകൾ വികസിപ്പിക്കുന്നതിൽ ഡോ. ജെന നിർണായക പങ്ക് വഹിച്ചിട്ടുണ്ട്.
നിരവധി ദേശീയ, അന്തർദേശീയ ഗവേഷണ പരിപാടികൾക്ക് അദ്ദേഹം നേതൃത്വം നൽകിയിട്ടുണ്ട്. നിലവിൽ ഇന്ത്യയിലെ നാഷണൽ സർവൈലൻസ് പ്രോഗ്രാം ഫോർ അക്വാട്ടിക് അനിമൽ ഡിസീസസിന്റെ തലവനാണ്. ഇന്ത്യൻ നെറ്റ്വർക്ക് ഓൺ ഫിഷറീസ് ആൻഡ് അനിമൽ ആന്റിമൈക്രോബയൽ റെസിസ്റ്റൻസ് (INFAAR) സ്ഥാപിക്കുന്നതിനും അദ്ദേഹം മു൯കയ്യെടുത്തിരുന്നു.
ഒരു മികച്ച ഗവേഷകനായ ഡോ. ജെന 200-ലധികം പിയർ-റിവ്യൂഡ് ഗവേഷണ പ്രബന്ധങ്ങൾ പ്രസിദ്ധീകരിച്ചിട്ടുണ്ട്. കൂടാതെ റാഫി അഹമ്മദ് കിദ്വായ് അവാർഡ്, ഐസിഎആർ ടീം റിസർച്ച് അവാർഡ്, പ്രൊഫ. എച്ച്.പി.സി. ഷെട്ടി അവാർഡ് ഫോർ എക്സലൻസ് ഇൻ ഫിഷറീസ് റിസർച്ച് എന്നിവയുൾപ്പെടെ നിരവധി വിശിഷ്ട ബഹുമതികൾ നേടിയിട്ടുണ്ട്. ഫിഷറി സയൻസിന്റെയോ സാങ്കേതികവിദ്യയുടെയോ ഏതെങ്കിലും ശാഖയിൽ മികച്ച സംഭാവനകൾ നൽകിയ പ്രമുഖ ഇന്ത്യൻ ശാസ്ത്രജ്ഞരെയാണ് സോഫ്റ്റ് അവാർഡ് നൽകി ആദരിക്കുന്നത്. ഫലകവും, പ്രശസ്തിപത്രവും, 25,000/- രൂപയുടെ ക്യാഷ് പ്രൈസ് എന്നിവ ഉൾപ്പെടുന്നതാണ് അവാർഡ്.
