തിരുവനന്തപുരം: ഭാരതത്തിൻറ സർവ്വസൈന്യാധിപയായ രാഷ്ട്രപതി ദ്രൗപദി മുർമു ഇന്ന് തിരുവനന്തപുരത്തെത്തും. ശംഖുമുഖം ബീച്ചിൽ നടക്കുന്ന നാവികസേന ദിനാഘോഷത്തിൽ മുഖ്യാതിഥിയായി പങ്കെടുക്കുന്നതിനാണ് രാഷ്ട്രപതി തലസ്ഥാനത്ത് എത്തുന്നത്. തിരുവനന്തപുരം അന്താരാഷ്ട്ര വിമാനത്താവളത്തിൽ എത്തുന്ന രാഷ്ട്രപതിയെ ഗവർണർ രാജേന്ദ്ര വിശ്വനാഥ് അർലേക്കറുടെ നേതൃത്വത്തിൽ സ്വീകരിക്കും.
വൈകിട്ട് നാലിനാണ് നാവികസേനയുടെ ശക്തിപ്രകടനം. നാവികസേന മേധാവി ദിനേശ് കെ ത്രിപാഠിയും ചടങ്ങിൽ പങ്കെടുക്കും. നാവികസേന ഒരുക്കിയ രണ്ട് ഹ്രസ്വചിത്രങ്ങൾ രാഷ്ട്രപതിക്ക് മുൻപാകെ പ്രദർശിപ്പിക്കും. ഐഎൻഎസ് വിക്രാന്ത്, ഐഎൻഎസ് കൊൽക്കത്ത, ഐഎൻഎസ് ഇംഫാൽ, ഐഎൻഎസ് തൽവാർ, ഐഎൻഎസ് ത്രിശൂൽ എന്നീ പടക്കപ്പലുകൾ അഭ്യാസ പ്രകടനത്തിൽ അണിനിരക്കും. കൂടാതെ പായ്കപ്പലുകളായ ഐഎൻഎസ് തരങ്കിണിയും ഐഎൻഎസ് സുദർശിനിയും ശക്ത പ്രകടനത്തിന്റെ ഭാഗമാകും.
ഇതാദ്യമായാണ് നാവികദിനാഘോഷം കേരളത്തിൽ നടക്കുന്നത്. പരിപാടികൾക്ക് ശേഷം രാഷ്ട്രപതി ഗവർണറുടെ ഔദ്യോഗിക വസതിയായ ലോക്ഭവനിൽ വിശ്രമിക്കും. നാളെ രാവിലെ 9.45 ഓടെ വ്യോമസേനയുടെ പ്രത്യേക വിമാനത്തിൽ രാഷ്ട്രപതി ഡൽഹിക്ക് മടങ്ങും.
