വിവാഹഒരുക്കങ്ങളുടെ കൂട്ടത്തിൽ ഏവരും ശ്രദ്ധിക്കുന്ന കാര്യമാണ് ഹണിമൂൺ. പുതിയ സ്ഥലങ്ങൾ അന്വേഷിച്ചും ഹണിമൂൺ ആഘോഷിക്കാൻ പറ്റിയ ഇടങ്ങൾ പരതിയും തിരക്കിലായിരിക്കും വധൂവരന്മാർ. കുളു, മണാലി, താജ്മഹൽ, കശ്മീർ തുടങ്ങിയ സ്ഥലങ്ങളായിരിക്കും അധികവും തെരഞ്ഞെടുക്കുന്നത്. കൂടുതൽ പേരും യാത്ര ചെയ്യുന്നതും നോർത്ത് ഇന്ത്യയിലേക്കാണ്. എന്നാൽ തമിഴ്നാട്ടിലും യാത്രകൾക്ക് പറ്റിയ അതിമനോഹരമായ സ്ഥലങ്ങളുണ്ട്. അവ ഏതൊക്കെയെന്ന് നോക്കാം.
കുന്നൂർ
തമിഴ്നാട്ടിലെ ഊട്ടിക്ക് സമീപത്തുള്ള ഹിൽ സ്റ്റേഷനാണ് കുന്നൂർ. സമുദ്രനിരപ്പിൽ നിന്ന് 1850 മീറ്റർ ഉയരത്തിൽ സ്ഥിതിചെയ്യുന്ന ചെറിയ ടൗണാണിത്. നീലഗിരി ചായപ്പൊടി ഉത്പാദിപ്പിക്കുന്ന സ്ഥലമാണ് ഇവിടം.
കൊടൈക്കനാൽ
ഹണിമൂണിന് പ്ലാൻ ചെയ്യുമ്പോൾ തന്നെ പലരുടെയും മനസിൽ വരുന്ന പേരാണ് കൊടൈക്കനാൽ. പളനിമലയുടെ മുകളില് സ്ഥിതിചെയ്യുന്ന കൊടൈക്കനാല്, ഇന്ത്യയിലെ ഏറ്റവും പ്രശസ്തമായ വിനോദ സഞ്ചാര കേന്ദ്രങ്ങളിലൊന്നാണ്. മലനിരകളുടെ രാജകുമാരി എന്നൊരു വിളിപ്പേരും കൊടൈക്കനാലിനുണ്ട്.
കൊല്ലി ഹിൽസ്
തമിഴ്നാട്ടിലെ നാമക്കല് ജില്ലയില് സ്ഥിതി ചെയ്യുന്ന അതിമനോഹരമായ മലനിരകളാണ് കൊല്ലി. 280 ചതുരശ്ര കിലോമീറ്റര് വ്യാപിച്ചു കിടക്കുന്ന കൊല്ലിമല പ്രകൃതി സൗന്ദര്യം കൊണ്ട് അനുഗ്രഹീതമാണ്. സമുദ്ര നിരപ്പില് നിന്നും 1000 മുതല് 1300 വരെ മീറ്റര് ഉയരത്തിലാണ് കൊല്ലി മല സ്ഥിതി ചെയ്യുന്നത്.
കോട്ടഗിരി
നീലഗിരി ജില്ലയിലെ പ്രധാന ഹിൽ സ്റ്റേഷനുകളിലൊന്നാണ് കോട്ടഗിരി. കൊടുമുടികള്, വെള്ളച്ചാട്ടങ്ങള്, കാനനപാതകൾ എന്നിവ കോട്ടഗിരിയിലുണ്ട്. യാത്രക്കാർക്ക് അതിമനോഹരമായ കാഴ്ചവിരുന്നൊരുക്കാൻ കോട്ടഗിരി വനമേഖലയ്ക്ക് സാധിക്കും.
ഊട്ടി
തമിഴ്നാട് സംസ്ഥാനത്തിലെ നീലഗിരി ജില്ലയിലാണ് ഊട്ടി എന്ന പ്രകൃതിരമണീയമായ പട്ടണം സ്ഥിതിചെയ്യുന്നത്. ജനപ്രിയ ടൂറിസ്റ്റ് കേന്ദ്രങ്ങളിലൊന്നാണ് ഊട്ടി. അതുകൊണ്ട് തന്നെ വെക്കേഷനുകൾ ആഘോഷിക്കാൻ നിരവധി ആളുകൾ ഇവിടേക്ക് എത്താറുണ്ട്.
