ന്യൂഡൽഹി: ഇന്ത്യയിലെ ചൈനീസ് എംബസി ഓൺലൈൻ വിസ അപേക്ഷാ സംവിധാനം ഇന്ന് ആരംഭിക്കും. ഡൽഹിയിലെ ചൈനീസ് വിസ ആപ്ലിക്കേഷൻ സർവീസ് സെന്ററാണ് ഓൺലൈൻ സംവിധാനത്തോടെ അപേക്ഷ ആരംഭിച്ചത്. ഇന്ന് മുതൽ വിസയ്ക്ക് വേണ്ട അപേക്ഷാഫോമുകൾ പൂരിപ്പിക്കാനും ആവശ്യമായ രേഖകൾ ഓൺലൈനായി അപ് ലോഡ് ചെയ്യാനും സാധിക്കും. ഇന്ത്യയിലെ ചൈനീസ് അംബാസഡറാണ് ഇക്കാര്യം അറിയിച്ചത്.
അപേക്ഷയ്ക്കുള്ള വിവരങ്ങൾ ഔദ്യോഗിക വെബ്സൈറ്റിൽ പങ്കുവച്ചിട്ടുണ്ട്. ഡൽഹിയിലെ ബാബ ഖരക് സിംഗ് മാർഗിലെ ശിവാജി സ്റ്റേഡിയം മെട്രോ സ്റ്റേഷന്റെ കോൺകോഴ്സ് നിലയിലാണ് ഇത് സ്ഥിതി ചെയ്യുന്നത്. അപേക്ഷകർക്കായി മൊബൈൽ നമ്പറും പങ്കുവച്ചു.
ഇന്ത്യയും ചൈനയും തമ്മിലുള്ള ഉഭയകക്ഷി ബന്ധം പുനഃസ്ഥാപിക്കുന്നതിന്റെ ഭാഗമായുള്ള നിർണായക ചുവടുവയ്പ്പാണിത്. 2020-ലെ അതിർത്തി സംഘർഷങ്ങളെ തുടർന്ന് ഏർപ്പെടുത്തിയ അഞ്ച് വർഷത്തെ സസ്പെൻഷൻ അവസാനിപ്പിച്ചുകൊണ്ടാണ് ഇരുരാജ്യങ്ങളിലെയും പൗരന്മാർക്ക് വിസ നൽകുന്നത്. ചൈനീസ് പൗരന്മാർക്ക് ബിസിനസ്, ടൂറിസം ആവശ്യങ്ങൾക്ക് നൽകുന്ന വിസ സംവിധാനവും പ്രവർത്തനക്ഷമമാണെന്ന് വിദേശകാര്യ മന്ത്രാലയം അറിയിച്ചു.
