നഗരജീവിതം നൽകുന്ന സമ്മർദ്ദങ്ങൾക്കിടയിൽ മനസ്സും ശരീരവും തണുപ്പിക്കാൻ ഒരു യാത്ര പോകണം എന്ന് ആഗ്രഹിക്കുന്നുണ്ടോ, നിങ്ങൾ വടക്കൻ കേരളത്തിലെങ്കിൽ ആദ്യം തെരഞ്ഞെടുക്കാവുന്നത് റാണിപുരം ആണ്. അത്യുത്തരകേരളത്തിലാണ് സ്ഥിതി ചെയ്യുന്നതെങ്കിലും ഇത് വടക്കൻ കേരളത്തിന്റെ ഊട്ടിയാണ്.
കാഞ്ഞങ്ങാട് നിന്ന് 43 കിലോമീറ്റർ അകലെ സ്ഥിതിചെയ്യുന്ന വളരെ മനോഹരമായ ഒരു സ്ഥലമാണിത്. കടൽനിരപ്പിൽ നിന്നും 750 മീറ്റർ ഉയരത്തിലാണ് ഇത് സ്ഥിതി ചെയ്യുന്നത്. പ്രകൃതി രമണീയമായ ഇവിടം നിത്യഹരിത ചോല വനങ്ങളും വിശാലമായ പുൽമേടുകളും നിറഞ്ഞതാണ്. നിരവധി മൃഗങ്ങളും അസംഖ്യം കിളികളും ചിത്രശലഭങ്ങളും അപൂർവ ഔഷധസസ്യങ്ങളും എല്ലാം ചേർന്ന ഈ പ്രദേശം നമ്മുടെ മനസ്സിനെയും ശരീരത്തെയും കുളിരണിയിക്കുക തന്നെ ചെയ്യും. കർണാടകത്തിലെ കൂർഗ് മലനിരകളും തലക്കാവേരി വന്യജീവി സങ്കേതവും റാണി പുഴത്തിനോട് ചേർന്നാണ് ഉള്ളത്.
പ്രകൃതി സ്നേഹികൾക്കു മാത്രമല്ല സാഹസികർക്കും ഒരേ പോലെ പ്രിയപ്പെട്ട സ്ഥലമാണിത്.വളരെ സുന്ദരമായ ഒരു സോഫ്റ്റ് ട്രക്കിംഗ് പാത ഇവിടെയുണ്ട്. അധികം ആയാസം ഒന്നുമില്ലാത്തതും എന്നാൽ ട്രക്കിങ്ങിന്റെ എല്ലാ മനോഹാരിതയും അനുഭവിക്കാവുന്നതുമായ അഞ്ചു കിലോമീറ്റർ ദൂരം ജീവിതത്തിലെ നല്ല ഒരു അനുഭവമായിരിക്കും.യാത്ര പോകുമ്പോൾ കാഞ്ഞങ്ങാട് നിന്നും പനത്തടിയിൽ നിന്നും റാണിപുരത്തേക്ക് എത്താം. ഡി.ടി.പി.സിയുടെ താമസസൗകര്യവും റാണി പുരത്ത് ലഭ്യമാണ്.
റാണിപുറത്ത് എത്താൻ ഏറ്റവും പറ്റിയ കാലം വർഷകാലമാണ്. നേർത്ത മഴ നൽകുന്ന തണുപ്പിൽ എന്തുവാടെ പച്ച പുതച്ച് സൗന്ദര്യവതിയായി കിടക്കുന്ന മലയോരത്തിന്റെ റാണി ഏതൊരു മനസ്സിനെയും പ്രണയാതുരമാക്കും.അതുകൊണ്ടു തന്നെ ഇപ്പോൾ ഇവിടം പ്രണയ ജോഡികളുടെയും പുതു ദമ്പതികളുടെയും സ്വർഗ്ഗമാണ്.
മറ്റ് സംസ്ഥാനങ്ങളിൽ നിന്നടക്കം ധാരാളം വിനോദസഞ്ചാരികൾ ഒഴുകിയെത്താൻ തുടങ്ങിയതോടെ ഇന്ത്യയിലെ അറിയപ്പെടുന്ന മൺസൂൺ വിനോദസഞ്ചാരകേന്ദ്ര പട്ടികയിൽ റാണിപുരം മുൻനിരയിൽ ഇടപിടിച്ചു കഴിഞ്ഞു. നിങ്ങൾ ഒരു ഹണിമൂൺ ട്രിപ്പിന് പ്ലാൻ ചെയ്യുകയാണെങ്കിൽ, അതിൽ വടക്കൻ കേരളം ഉൾപ്പെടുന്നുണ്ടെങ്കിൽ റാണിപുരം ഒരിക്കലും ഒഴിവാക്കരുതാത്ത സ്ഥലമാണ്. സമുദ്രനിരപ്പിൽ നിന്ന് 1049 മീറ്റർ ഉയരത്തിലുള്ള മാനിമലയുടെ പച്ചപ്പും സൗന്ദര്യവും റാണിപുരത്ത് നിന്നുകൊണ്ട് കൺകുളിർക്കെ കാണാൻ സാധിക്കും.
