അസം: ഏകദേശം6950 കോടി രൂപയുടെ പദ്ധതികളുടെ നിർമാണ ഉദ്ഘടനം ഇന്ന് പ്രധാനമന്ത്രി നിർവ്വഹിക്കും.വടക്കുകിഴക്കൻ മേഖലയിലെ പ്രാദേശിക കണക്റ്റിവിറ്റി വർദ്ധിപ്പിക്കുന്നതിനായി കാസിരംഗ എലിവേറ്റഡ് കോറിഡോർ പദ്ധതിക്ക് ഞായറാഴ്ച പ്രധാനമന്ത്രി നരേന്ദ്ര മോദി തറക്കല്ലിടുകയും രണ്ട് അമൃത് ഭാരത് എക്സ്പ്രസ് ട്രെയിനുകൾ ഫ്ലാഗ് ഓഫ് ചെയ്യുകയും ചെയ്യും. അസം സന്ദർശനത്തിന്റെ രണ്ടാം ദിവസമായ ഇന്ന് അദ്ദേഹം കാലിയബോറിൽ ഒരു പൊതു റാലിയെ അഭിസംബോധന ചെയ്യും.
നാഗോൺ ജില്ലയിലെ കാലിയബോറിൽ നടക്കുന്ന പ്രധാന വികസന പദ്ധതികളുടെ ‘ഭൂമി പൂജ’യ്ക്കായി കാത്തിരിക്കുകയാണെന്ന് പ്രധാനമന്ത്രി മോദി പറഞ്ഞു. ”കാസിരംഗയ്ക്ക് കുറുകെയുള്ള 35 കിലോമീറ്റർ എലിവേറ്റഡ് ഇടനാഴി ഉൾപ്പെടെയുള്ള പ്രധാന വികസന പ്രവർത്തനങ്ങളുടെ ഭൂമി പൂജയ്ക്കായി ഇന്ന് അസമിലെ കാലിയബോറിൽ എത്താൻ ആഗ്രഹിക്കുന്നു. മൃഗങ്ങളെ സംരക്ഷിക്കുന്നതിൽ, പ്രത്യേകിച്ച് മഴക്കാലത്ത് ഇത് വളരെയധികം സഹായിക്കും,” പ്രധാനമന്ത്രി എക്സിലെ ഒരു പോസ്റ്റിൽ പറഞ്ഞു.
86 കിലോമീറ്റർ നീളമുള്ള കാസിരംഗ എലിവേറ്റഡ് കോറിഡോർ പദ്ധതി പരിസ്ഥിതി സൗഹൃദപരമായ ഒരു ദേശീയ പാത പദ്ധതിയാണ്. കാസിരംഗ ദേശീയോദ്യാനത്തിലൂടെ കടന്നുപോകുന്ന 35 കിലോമീറ്റർ എലിവേറ്റഡ് വൈൽഡ്ലൈഫ് കോറിഡോർ, 21 കിലോമീറ്റർ ബൈപാസ് ഭാഗം, NH-715 ന്റെ 30 കിലോമീറ്റർ വീതി കൂട്ടൽ എന്നിവ ഇതിൽ ഉൾപ്പെടും. കാസിരംഗ നാഷണൽ പാർക്കിന്റെ സമ്പന്നമായ ജൈവവൈവിധ്യത്തിന്റെ സംരക്ഷണം ഉറപ്പാക്കുന്നതിനൊപ്പം പ്രാദേശിക കണക്റ്റിവിറ്റി മെച്ചപ്പെടുത്തുക എന്നതാണ് പദ്ധതി ലക്ഷ്യമിടുന്നത്.
നാഗോൺ, കർബി ആംഗ്ലോങ്, ഗോലാഘട്ട് ജില്ലകളിലൂടെ കടന്നുപോകുന്ന ഈ പദ്ധതി അപ്പർ അസമിലേ ദിബ്രുഗഢ്, ടിൻസുകിയ എന്നിവിടങ്ങളിലേക്കുള്ള കണക്റ്റിവിറ്റി ഗണ്യമായി മെച്ചപ്പെടുത്തും. ഉയർത്തി നിർമ്മിക്കുന്ന വന്യജീവി ഇടനാഴി മൃഗങ്ങളുടെ തടസ്സമില്ലാത്ത സഞ്ചാരം ഉറപ്പാക്കുകയും മനുഷ്യ-വന്യജീവി സംഘർഷം കുറയ്ക്കുകയും ചെയ്യും. ഇത് റോഡ് സുരക്ഷ വർദ്ധിപ്പിക്കുകയും യാത്രാ സമയവും അപകട നിരക്കും കുറയ്ക്കുകയും വർധിച്ചു വരുന്ന യാത്രക്കാരുടെ എണ്ണത്തെയും ചരക്ക് ഗതാഗതത്തെയും പിന്തുണയ്ക്കുകയും ചെയ്യും. പദ്ധതിയുടെ ഭാഗമായി, ജഖലബന്ധയിലും ബൊക്കാഘട്ടിലും ബൈപാസുകൾ വികസിപ്പിക്കും, ഇത് പട്ടണങ്ങളിലെ തിരക്ക് കുറയ്ക്കുന്നതിനും പ്രദേശവാസികളുടെ ജീവിത നിലവാരം ഉയർത്തുന്നതിനും സഹായിക്കും.
ഗുവാഹത്തി (കാമാഖ്യ)-റോഹ്തക് അമൃത് ഭാരത് എക്സ്പ്രസ്, ദിബ്രുഗഡ്-ലഖ്നൗ (ഗോമതി നഗർ) അമൃത് ഭാരത് എക്സ്പ്രസ് എന്നീ രണ്ട് പുതിയ അമൃത് ഭാരത് എക്സ്പ്രസ് ട്രെയിനുകൾ മോഡി ഫ്ലാഗ്ഗ് ഓഫ് ചെയ്യും . ഈ പുതിയ ട്രെയിൻ സർവീസുകൾ വടക്കുകിഴക്കൻ ഇന്ത്യയ്ക്കും വടക്കേ ഇന്ത്യയ്ക്കും ഇടയിലുള്ള റെയിൽ കണക്റ്റിവിറ്റി ശക്തിപ്പെടുത്തുകയും ജനങ്ങൾക്ക് സുരക്ഷിതവും സൗകര്യപ്രദവുമായ യാത്ര സാധ്യമാക്കുകയും ചെയ്യും.
ഇന്ന് രാവിലെ നടക്കുന്ന ചടങ്ങിൽ ആസാം ഗവർണർ ലക്ഷ്മൺ പ്രസാദ് ആചാര്യ, ആസാം മുഖ്യമന്ത്രി ഹിമന്ദ ബിശ്വ ശർമ കേന്ദ്രമന്ത്രി സർബാനന്ദ സോണാവാൾ കേന്ദ്ര മന്ത്രി പവിത്ര മാർഗരിത എന്നിവർ പങ്കെടുക്കുന്നു.
രണ്ട് ദിവസത്തെ അസം സന്ദർശനത്തിനായി പ്രധാനമന്ത്രി മോദി ശനിയാഴ്ച ഗുവാഹത്തിയിലെത്തി. അർജുൻ ഭോഗേശ്വർ ബറുവ സ്റ്റേഡിയത്തിൽ നടന്ന പരിപാടിയിൽ 10,000-ത്തിലധികം കലാകാരന്മാർ പങ്കെടുത്ത ബോഡോ നാടോടി നൃത്തമായ ‘ബാഗുരുംബ’യ്ക്ക് അദ്ദേഹം സാക്ഷ്യം വഹിച്ചു.
