കേരളീയ വിവാഹങ്ങളുടെ ഏറ്റവും എടുപ്പുള്ള ഫ്ലാഗ് ഷിപ്പ് എന്നത് സദ്യയാണ്. വിവാഹസദ്യ എന്നത് പപ്പടം പഴം പായസം സാമ്പാർ എന്ന കോമ്പിനേഷനിലാണ് കേരളത്തിലങ്ങോളം ഇങ്ങോളം പ്രചാരത്തിലുളളത്. മേനി കൂട്ടാൻ മറ്റനേകം വിഭവങ്ങൾ ചേർക്കാറുണ്ട്.
വിവാഹ സദ്യയുടെ രീതികൾ കേരളത്തിൽ ഓരോ സ്ഥലത്തും ഓരോന്നാണ്. തിരുവനന്തപുരത്തും ആലപ്പുഴയിലും കൊച്ചിയിലും തൃശൂരിലും കോഴിക്കോട്ടും കണ്ണൂരിലും ഒക്കെ പ്രാദേശികമായ രുചിഭേദങ്ങൾ ഉണ്ടെങ്കിലും കേരളം മുഴുവൻ പ്രചുര പ്രചാരത്തിലുള്ള ഭക്ഷണ രീതിജ്കളും ഉണ്ട്.
അതെ പോലെ ഏതെങ്കിലും ഒരു ഭാഗത്ത് മാത്രം പ്രചാരത്തിലിരിക്കുകയും അതിന്റെ മേന്മയും സ്വാദും കൊണ്ട് കേരളത്തിൽ ആകമാനം സ്വീകാര്യത നേടുകയും ചെയ്ത വിഭവങ്ങളുമുണ്ട്. ഇത്തരത്തിലുള്ള വിഭവങ്ങളിൽ ഒന്നാം സ്ഥാനത്ത് നിൽക്കുന്നത് ബോളി എന്ന ഐറ്റമാണ്. സത്യത്തിൽ ഇത് തലസ്ഥാന ജില്ലയുടെ രാജകീയ ഭക്ഷണമാണ്. ആദ്യകാലങ്ങളിൽ ഇത് അനന്തപുരിയിൽ മാത്രം ഒതുങ്ങി നിന്നിരുന്നു. പായസത്തിനൊപ്പം ഞെരുടി കഴിക്കുന്ന മഞ്ഞ നിറമുള്ള അതീവ സ്വാദിഷ്ടമായ ഈ പലഹാരം അനന്തപുരിയുടെ രുചിപ്പെരുമയുടെ കൊടിയടയാളമായി മാറിയിരുന്നു. തിരുവനന്തപുരത്ത് കല്യാണത്തിന് വന്നാൽ ബോളിയും പായസവും കഴിക്കാം എന്ന് ആളുകൾ അടക്കം പറയുന്ന സാഹചര്യം പോലും ഉണ്ടായി.
എന്നാൽ നല്ലത് ഏതിനെയും മനസ്സറിഞ്ഞു സ്വീകരിക്കുകയും സ്വംശീകരിക്കുകയും ചെയ്യുക എന്ന മനുഷ്യന്റെ ആന്തരികമായ ചോദനയുടെ ഫലമായി അനന്തപുരിയുടെ ബോളി കേരളമാകെ പടർന്നു എന്ന് പറയണം.ഇന്ന് ഈ പലഹാരം കേരളത്തിൽ ഒട്ടാകെ പ്രചുര പ്രചാരം നേടിക്കഴിഞ്ഞു. ജാതി മത വ്യത്യസമില്ലാതെ ഏതു വിവാഹ സദ്യയിലും ഓണ സദ്യയിലും പൊലിമ കൂട്ടാൻ ബോളി ഉൾപ്പെടുത്തുന്ന സാഹചര്യവുമായിക്കഴിഞ്ഞു.
അങ്ങിനെ വളരെ സ്വാദിഷ്ടമായ ഈ വിഭവം ഇപ്പോൾ അനന്തപുരിയുടെ രുചിയടയാളം എന്നതിൽ നിന്ന് കേരളത്തിന്റെ മൊത്തം കൊതിയടയാളമായി മാറി.
