ന്യൂഡൽഹി : ജനം ടിവിയും ജനം സൗഹൃദവേദിയും സംയുക്തമായി ഡൽഹിയിൽ സംഘടിപ്പിക്കുന്ന ‘ജനോത്സവം’ 2026 പരിപാടിയിൽ സംഘാടന പങ്കാളിയായി ഡൽഹി സർക്കാർ. കേന്ദ്ര സാംസ്കാരിക മന്ത്രാലയത്തിന്റെ പിന്തുണയോടെയാണ് പരിപാടി സംഘടിപ്പിക്കുന്നത്.
പരിപാടി വിശദീകരിക്കാനും പിന്തുണ തേടാനും ഡൽഹി മുഖ്യമന്ത്രി രേഖാ ഗുപ്ത, സാംസ്ക്കാരിക വകുപ്പ് മന്ത്രി കപിൽ മിശ്ര, വിദ്യാഭ്യാസ വകുപ്പ് മന്ത്രി ആശിഷ് സൂദ് എന്നിവരെ സി സദാനന്ദൻ മാസ്റ്റർ എംപിയുടെ നേതൃത്വത്തിൽ പ്രതിനിധി സംഘം സന്ദർശിച്ചു. ഡൽഹി മുഖ്യമന്ത്രി രേഖ ഗുപ്ത ജനോത്സവം 2026 പരിപാടിയുടെ ബ്രോഷർ പ്രകാശനം ചെയ്തു. ഇന്ത്യ ഹാബിറ്റാറ്റ് സെൻ്റർ ഡയറക്ടറും ജനോത്സവം ചെയർമാനുമായ പ്രൊഫ. കെ.ജി.സുരേഷ്, ജനം TV പ്രഭാരി എ.ജയകുമാർ തുടങ്ങിയവർ പങ്കെടുത്തു.
മാർച്ച് 27, 28, 29 തിയ്യതികളിൽ ഡൽഹി തൽക്കത്തോറ ഇൻഡോർ സ്റ്റേഡിയത്തിൽ അരങ്ങേറുന്ന ജനോത്സവം, കേരളത്തിന്റെ സാംസ്ക്കാരികത്തനിമയും കലാപാരമ്പര്യവും സനാതന ദേശീയ സംസ്കൃതിയോടുള്ള കേരളത്തിന്റെ അഭേദ്യമായ ബന്ധവും ആവിഷ്ക്കരിക്കുന്ന കലാ മാമാങ്കമാണ്.
