മലപ്പുറം: കോൺഗ്രസ് നേതാവ് സന്ദീപ് വാര്യർക്ക് സ്വാഗതം അർപ്പിച്ചുകൊണ്ട് തവനൂരിൽ സ്ഥാപിച്ചിരുന്ന ഫ്ലക്സിനു മുകളിൽ പ്രതിഷേധ കുറിപ്പ്. പൊറൂക്കര മണ്ഡലം കോൺഗ്രസ് കമ്മറ്റിയുടെ പേരിൽ സ്ഥാപിച്ചിരുന്ന ഫ്ളക്സിലാണ് പ്രതിഷേധ കുറിപ്പ് പ്രത്യക്ഷപ്പെട്ടത്.
‘സന്ദീപ് വാര്യർക്ക് സ്വാഗതം’ എന്നെഴുതി സ്ഥാപിച്ച ഫ്ലക്സിന്റെ മുകളിൽ ‘ഗാന്ധിജിയെ ചെറുതായി ഒന്ന് വെടിവച്ചുകൊന്നു എന്നു പറഞ്ഞ വർഗീയവാദി വാര്യർ ഈ നാടിനു വേണ്ട’ എന്ന് എഴുതിയ കുറിപ്പ് ആണ് ഒട്ടിച്ചുവെച്ചിട്ടുള്ളത്. തവനൂരിലെ കോൺഗ്രസിന്റെ സ്ഥാനാർത്ഥിയെ ഔദ്യോഗികമായി പ്രഖ്യാപിക്കുന്നതിന് മുൻപേയാണ് സന്ദീപിന് സ്വാഗതമെന്നുള്ള ഫ്ളക്സ് സ്ഥാപിച്ചത്.
ഇത് സന്ദീപിന്റെ തന്നെ തന്ത്രമാണെന്നാണ് ആരോപണം. തനിക്ക് മുസ്ലിം ലീഗിന്റെ പിന്തുണയോടെ തവനൂർ സീറ്റ് കിട്ടാനായി ആളെ വെച്ച് സ്ഥാപിച്ച പോസ്റ്ററാണ് ഇതെന്നാണ് സോഷ്യൽ മീഡിയ ആരോപിക്കുന്നത്.മുസ്ലിം ലീഗ് ചത്ത കുതിരയാണെന്നും വർഗീയ വാദികളാണെന്നും പറഞ്ഞ സന്ദീപിന് വോട്ടില്ല എന്നും പോസ്റ്ററിൽ ഉണ്ട്.
